سەرۆكوەزیرانی پاكستان: گەیشتووینەتە دەقی كۆتایی ڕێككەوتنى ئاشتى ئێران و ئەمریكا

پەیام

شەهباز شەریف، سەرۆكوەزیرانی پاكستان، گەیشتن بە دەقی كۆتایی و ڕێككەوتووی بۆ ڕێككەوتنی ئاشتی لە نێوان تاران و واشنتن ڕاگەیاند.

شەهباز شەریف ئاماژەی بەوە كرد، كە وڵاتەكەی بە وردی لەگەڵ هەردوو لایەن كار دەكات بۆ دیاریكردنی هەنگاوەكانی داهاتووی پڕۆسەی ئاشتی و جەختی كردەوە، كە ئێستا ئاشتی لە هەموو كاتێك نزیكترە.

هەروەها هۆشداریشی دا لە هەبوونی هەڵمەتێكی چەواشەكاری لەلایەن ئەو لایەنانەی دەیانەوێت پڕۆسەی ئاشتی و ڕێككەوتنەكە تێكبدەن.

هاوكات، عەباس عەراقچی، وەزیری دەرەوەی ئێران، پشتڕاستی كردەوە كە گەیشتن بە لێكتێگەیشتن لەگەڵ ویلایەتە یەكگرتووەكان زۆر نزیكە، بەڵام داوای لە میدیاكان كرد تا واژۆكردنی كۆتایی، خۆیان لە بڵاوكردنەوەی پێشبینییەكان بەدوور بگرن.

لە بەرامبەردا، دۆناڵد ترەمپ، سەرۆكی ئەمریكا، كاردانەوەی توندی بەرامبەر ئەو مەرجانە هەبوو كە لە میدیاكاندا وەك ڕەشنووسی ڕێككەوتنەكە دزەیان پێكراوە و ڕایگەیاند، ئەو زانیارییانەی تاران بڵاوی كردوونەتەوە گوزارشت لەو مەرجانە ناكەن كە لە ڕاستیدا هەردوولا لەسەری ڕێككەوتوون.

ئەم پێشهاتە نوێیە ئومێدێكی گەورەی بۆ كۆتاییهێنان بە ئاڵۆزییەكانی چەند ساڵەی نێوان هەردوو وڵات دروست كردووە.