گەشتە ئاسمانییەكانی نێوان عێراق و سوریا هێشتا دەستیپێنەكردوەتەوە

پەیام

وەزارەتی گواستنەوەی عێراق رایگەیاند، هێشتا گەشتە ئاسمانییەكانی نێوان عێراق و سوریا دەستیپێنەكردوەتەوە و ئەوەش پێویستی بە ڕەزامەندیی سیادی و هونەری هەیە.

مەیسەم سافی، وتەبێژی وەزارەتی گواستنەوەی عێراق دەڵێت، دەستپێكردنەوەی گەشتەكانی نێوان عێراق و سووریا پێویستی بە هەماهەنگیی بەرزی نێوان لایەنە پەیوەندیدارەكان هەیە، كە هێشتا ئەوە نەكراوە.

هەروەها ڕایشیگەیاند، هێشتا لە لایەن دەسەڵاتی فڕۆكەوانی مەدەنی عێراقییەوە ڕەزامەندی بە دەست پێ كردنەوەی گەشتەكان نەدراوە، هەروەها هێشتا ڕەزامەندی ئەوەش وەرنەگیراوە كە گەشتەكان لە سوریاوە بۆ عێراق دەست پێ بكەن.

وتەبێژی وەزارەتی گواستنەوەی عێراق وتووشیەتی، لە ئێستادا هیچ گەشتێكی ئاسمانی لە نێوان عێراق و سووریا ئەنجام نادرێت، ڕاگرتنی گەشتەكانیش كاتییە، بەڵام هێشتا نازانین كەی دەست پێ دەكاتەوە و پێویستە لایەنە پەیوەندیدارەكان ڕەزامەندی بدەن و هەماهەنگی پێویستیش بۆ دەست پێكرنەدەوەی بكرێت.