سەرۆكوەزیرانی عێراق بە دوو مەرج ڕازی بووە بە ناردنی مووچەی مانگی پێنج بۆ هەرێم

پەیام 

سەرۆكوەزیرانی عێراق بەدوو مەرجی سەرەكی ڕازی بووە بە ناردنی مووچەی مووچەخۆرانی هەرێمی كوردستان بۆ مانگی ئایار.

 سەرچاوەیەكی بەرپرسی باڵا ئاشكرایكرد، محەممەد شیاع سوودانی سەرۆكوەزیرانی عێراق وەڵامی فشارە ناوخۆیی و دەرەكییەكانی داوەتەوە سەبارەت بە ناردنی مووچەی مووچەخۆرانی هەرێمی كوردستان، هاوكات ئاماژەی بەوە كرد ڕەزامەندییەكە مەرجدارە بە ڕێكخستنی دارایی و چەند ڕێكارێكی دیاریكراو.

سەرچاوەكە بە بەغدادولیەومی ڕاگەیاندوە، سوودانی ڕازییە بە ناردنی مووچەی هەرێم، بەڵام بە دوو مەرجی سەرەكی، ئەویش یەكەمیان دەبێت مووچەكە بە شێوەی قەرز بنێردرێن و لەسەر بودجەی هەرێم حیساب بكرێن لە چوارچێوەی بەشی دیاریكراوی لە بودجەی گشتی.

هەروەرها مەرجی دووەمیان بریتییە لە دروستكردنی لیژنەیەكی هاوبەش لە حكومەتی فیدراڵ و حكومەتی هەرێم بۆ گفتوگۆ لەسەر چارەنووسی مووچەی هەشت مانگی ماوەی ئەمساڵ و میكانیزمی چارەسەركردنیان لە ناو چوارچێوە یاساییەكاندا.

سەرچاوەكە ڕوونیشی كردەوە ، سوودانی لە ناوەڕاستی هەفتەی داهاتوودا واژوو لەسەر لیستی مووچەی ئایار بۆ كوردستان دەكات، وەك خۆ ئامادەكردن بۆ گواستنەوەی بڕەی پارەكان بۆ وەزارەتی داراییی هەرێم.