كۆمیسیۆن: زیاتر لە 33 هەزار ئاوارە كارتی دەنگدانیان نوێكردووەتەوە

پەیام 

كۆمسیۆنی باڵای سەربەخۆی هەڵبژاردنەكانی عێراق رایگەیاندووە زیاتر لە 33 هەزار ئاوارەی ناوخۆی عێراق كارتی دەنگدانیان نوێ كردووەتەوە.

كۆمسیۆنی هەڵبژاردنەكانی عێراق بڵاویكردوەتەوە، تا ئێستا 33 هەزار و 141 ئاوارە بەمەبەستی بەشداریكردن لە هەڵبژاردنی پەرلەمانی عێراق كارتی بایۆمەتریی دەنگدانیان نوێكردووەتەوە.

بەپێی ئامارەكانی كۆمیسیۆنی باڵا، لەماوەی نوێكردنەوەی تۆماری كارتی بایۆمەتری دەنگدان نزیكەی ملیۆنێك دەنگدەر بۆ یەكەمجار مامەڵەی كارتی بایۆمەتری دەنگدانیان كردووە، هەروەها نزیكەی 470 هەزار كەسی دیكەش گۆڕانكارییان لە كارتەكانیاندا كردووە.

هەروەها بەپێی ڕاگەیەنراوی كۆمیسۆن، لەماوەی دوو مانگی ڕابردوودا زیاتر لە حەوت هەزار دەنگدەر ڕاستكردنەوەیان لە كارتەكانیاندا كردووە، لە كۆی پارێزگاكانی عێراقیشدا زیاتر لە هەزار كارت سڕاونەتەوە، بەڵام زیاتر لە 96 هەزار مامەڵەی نوێ بۆ دەرهێنانی كارتی بایۆمەتری كراوە.

رۆژی 11ی تشرینی دووەمی ئەمـساڵ بۆ ئـەنجامدانی هەڵبژاردنی ئەنجومەنی نوێنەرانی عێراق دیاریكراوە.