تاوەکو 10 رۆژى دیکە سەرجەم حاجییانى هەرێم دەگەڕێنەوە

پەیام 

نەبەز ئیسماعیل وتەبێژی وەزارەتی ئەوقافى هەرێم ڕایگەیاند:  رۆژى 12ی ئەم مانگە یەکەم کاروانی حاجییان بە رێگەی وشکانی دەگەڕێنەوە و تاوەکو 20ى مانگیش سەرجەم حاجییانى هەرێم دەگەڕێنەوە.
 
 راشیگەیاند: "مەراسیمى حەجحى ئەمساڵ کۆتایی هاتووە و ئەم ساڵ پرۆسەی حەج زۆر بە باشی بەڕێوەچوو؛ هیچ کێشەیەک نەبوو، جگە لە وەی حاجییەک گیانی لەدەستدا".
 
وتیشى "دوێنێ سێیەم رۆژى جەژن لە پاشنیوەڕۆوە بۆ دوایینجار رێوڕەسمی جەمەرات ئەنجامدرا و کۆتایی بە مەراسیمى حەجی ئەم ساڵ هات، تەنیا رێکارێک مابێت ئەوەیە حاجییان پێش گەڕانەوە تەوافی ماڵئاوایی بکەن".
 
ئاماژەى بەوەشکرد: 12ی ئەم مانگە یەکەم کاروانی حاجییان بە رێگەی وشکانی و 14ی مانگیش یەکەم کاروان بە رێگەی ئاسمانی دەگەڕێنەوە.  
 
ئەم ساڵ ئەوانەی بە رێگەی وشکانی بۆ رێوڕەسمەکانی حەج چوونە سعودیە، هەزار و 646 هاونیشتمانی بوون و ئەوانەشی بە گەشتی ئاسمان چوون سێ هەزار و 490 کەس بوون.
 
16ی ئایار، یەکەم کاروانی حاجییان لە هەرێمی کوردستانەوە بە رێگەی وشکانی بەرەو سعودیە بەڕێکەوت و یەکەم گەشتی ئاسمانییش 19ـی هەمان مانگ بەرەو ئەو وڵاتە بەڕێکەوت.