خوێندنی باڵا: له‌مساڵه‌وه‌ نمره‌ی وانه‌ی كوردی و عه‌ره‌بی بۆ ئاماده‌یی هه‌ژمار ده‌كرێت

په‌یام

وەزارەتى خوێندنى باڵاو توێژینەوەى زانستى ڕایگەیاند: لە ئەمساڵەوە وانەى کوردى و عەرەبى بۆ دەرچووانى ئامادەیى ئەژمار دەکرێت.
وەزارەتى خوێندنی باڵا ڕایگەیاندووە، نووسراوێکی فەرمییان بۆ وەزارەتى پەروەردە ناردووە و تیایدا هاتووە: بڕیارى ئارەزومەندانەى ئەژمارکردنى نمرەى وانەکانى کوردى و عەرەبى هەڵوەشاوەتەوەو نمرەى ئەم دوو وانەیە هاوشێوەى وانەکانى تر ئەژمار دەکرێن بۆ ئەو خوێندکار و قوتابیانەى لە ساڵى خوێندنى (٢٠٢٥-٢٠٢٦) و ساڵانى دواتر لە پۆلى دوانزەى ئامادەیین) واتە لە ئەمساڵەوە نمرەى خوێندکاران و قوتابیانى پۆلى دوانزە لەسەر بنەماى هەر حەوت وانەکە دەبێت.

وەزارەتى خوێندنى باڵا و توێژینەوەى زانستى ڕاشیگەیاندووە:  ئەو خوێندکار و قوتابیانەى بۆ ساڵى خوێندنى (٢٠٢٦-٢٠٢٧) و ساڵانى دواتر داواکارى پێشکەش دەکەن بۆ وەرگرتنیان لە زانکۆکانى هەرێم. وانەى کوردی و عەرەبییان هاوشێوەى وانەکانى دیکە بۆ هەژمار دەکرێت.
وەزارەتى خوێندنی باڵا داواشی کردووە، وەزارەتى پەروەردە سەرجەم قوتابخانە  وخوێندنگاکان لەو بڕیارە ئاگادار بکاتەوە.
چەند ساڵێکە وانەى کوردی و عەرەبی بۆ بەشێک لە بەش و کۆلێژەکانى زانکۆ و پەیمانگاکان بە شێوەى ئارەزوومەندانە هەژمار دەکرێت. ئەمەش واى کردبوو بەشێک لە قوتابیان بە گرنگیەوە لەو دوو وانەیە نەڕوانن و وەکو پێویست هەوڵى بۆ نەدەن. پێشبینیش دەکرێت بڕیارەکەى وەزارەتى خوێندنی باڵاى ناڕەزایى بەشێک لە قوتابیانی ١٢ى ئامادەیى لێ بکەوێتەوە.