09/06/2025
272 جار خوێنراوەتەوە
ئەمریكا.. خۆپیشاندان دژ بە دەستگیركردنی كۆچبەران و ناردنەوەیان بەردەوامە
پەیام
خۆپیشاندانەكان لە ویلایەتی لۆس ئانجلۆسی ئەمریكا كە بەمەبەستی دەربڕینی پشتیوانی بۆ كۆچبەران و دژ بە دەستگیركردنیان بەڕێوەدەچێت، چووە ناو سێیەمین ڕۆژەوە، هاوكات لەگەڵ ناردنی هێزەكانی پاسەوانی نیشتمانییش خۆپیشاندانەكان پەرەی سەندووە.
لەم سێ ڕۆژەدا بە بەردەوام تێكهەڵچوون لە نێوان هێزەكانی ئەمنی و خۆپیشاندەراندا هەبووە و چەندین برینداری لێكەوتووەتەوە.
لەسەر فەرمانی سەرۆكی ئەمریكا دۆناڵد ترەمپ، ڕۆژی ڕابردوو 300 هێزی پاسەوانی نیشتمانی بەمەبەستی بەرەنگاربوونەوەی خۆپیشاندەران ڕەوانەی شارەكە كران و هەڕەشەی ناردنی هێزی زیاتریشی بۆ كۆتایی هێنان بە خۆپیشاندانەكان كردووە.
خۆپیشاندانەكان دژ بە سیاسەتەكانی حكوومەت لەبارەی كۆچبەرانە بەڕێوەدەچن و داوا دەكەن حكومەت دەستهەڵبگرێت لە دەستگیركردنی كۆچبەران و ناردنەوەیان بە زۆرەملێ بۆ وڵاتەكانی خۆیان.
لە بەرامبەریشدا پۆلیسی ئەمریكا هەرچەشنە گردبوونەوەیەكی لەم شێوەیەی بە نایاسایی ڕاگەیاندووە و هەڕەشەی دەستگیركردنی خۆپیشاندەرانی كردووە.
لە تۆڕە کۆمەڵایەتیەکان شەیری بکە