ڕووسیا تێپەڕاندنی سنووری هەرێمێكی دیكەی لە ئۆكرانیا ڕاگەیاند

پەیام 

ڕووسیا بەردەوامە لە پێشڕەوییەكانی و تێپەڕاندنی سنووری هەرێمێكی دیكەی لە ئۆكرانیا ڕاگەیاند.

وەزارەتی بەرگریی ڕووسیا ڕایگەیاندووە هێزەكانیان توانیوویانە سنووری ئیداری هەرێمی "دنیبرو بیترۆفسك" لە "دۆنیتسك" تێپەڕێنن و لە ئێستادا سەرقاڵی فراوانخوازین لەناو هەرێمەكە.

ئاماژەی بەوەیش كردووە هێرشی ئاسمانییان كردووەتە سەر دامەزراوەكانی بەرهەمهێنانی درۆن و كۆگاكانی هەڵگرتنیان و كۆگاكانی تەقەمەنی و پێگەكانی سوپای ئۆكرانیا لە 139 ناوچەی وڵاتەكەیان.

لەوبارەیەوە دیمتری میدمیدیڤ جێگری سەرۆكی ئەنجوومەنی ئاسایشی ڕووسیا ڕایگەیاندووە، چوونەناوەوەی هەرێمی دنیبرۆ بیترفسكی ئۆكرانیا لەلایەن سوپای ڕووسیاوە، مانای ئەوەیە كە ئەوانەی ڕەتی دەكەنەوە دان بە واقیعی جەنگەكە لە دانوستاندا بنێن، لە سەر زەوی ڕووبەڕووی ڕاستیی نوێ دەبنەوە.

میدمیدڤ جەختی لەوەیش كردەوە، كە ئۆپراسیۆنەكانی سووپای ڕووسیا لە ئۆكرانیا بەردەوام دەبن.

هەرلەو چوارچێوەیەدا پێگەی دیب ستیت-ی سەربازیی ئۆكرانیی بڵاوی كردووەتەوە كە هێزەكانی ڕووسیا پێشڕەوییان لە هەرێمی سوومی كردووە و تەنیا 18 میلۆمەتر لە ناوەندی شاری سوومەیەوە دوورن و لە ناوچەكانی باكووری شارەكە بڵاو بوونەتەوە.

لای خۆیشیەوە دەستەی ئەركانی سوپای ئۆكرانیا پشتڕاستی كردەوە بە درێژایی بەرەكانی جەنگ، 193 ڕووبەڕووبوونەوە ڕووی داوە و كە سەرنجیان لەسەر ناوچەی باكرۆفسك و هەندێك ناوچەی دیكەی هەرێمی دۆنیتسك بووە، لەگەڵ چڕكردنەوەی هیرشەكانی سەر هەرێمی خاركیێڤ و هەندێك شاری زابارۆجیا.