سعودیە: حاجییان پایەكانی حەجیان تەواو كردووە و سەرقاڵى تەوافی ماڵئاوایین

پەیام 

وەزارەتی حەج و عومرەی سعودییە بڵاویكردەوە: حاجییان پایەكانی حەجیان تەواو كردووە و سەرقاڵى تەوافی ماڵئاوایین، جەختى لەوەشکردووەتەوە وەرزی حەجی ئەمساڵ سەركەوتوو بووە و تیم و لایەنە پەیوەندیدارەكانی سەربە وەزارەتەكەیان توانیویانە بە سەركەوتوویی كارەكانیان راپەرێنن.

وەزارەتی حەج و عومرەی سعودییە رایگەیاندووە، حاجییان پایەكانی حەجیان تەواو كردووە و بەشێكیان خەریكی بەجێهێنانی تەوافی وەداعن كە یەكێكە لە پایەكانی حەج.

هەروەها راشگەیەنراوە، هەزاران حاجی دیكە پایەكانی حەجیان تەواو كردووە بەرەو مەدینە و بەسەركردنەوەی شوێنەكانی دیكە بەڕێدەكەون و بەشێكی دیكەشیان بەرەو شوێنی مانەوەیان لە مەككە.

وەزارەتەكە راشیگەیاندووە، ئامادەكارییان بۆ قۆناغی دووەمی وەرزی حەجی ئەمساڵ كردووە، كە بریتییە لە سەردانی حاجییان بۆ شوێنە دێرین و پیرۆزەكانی دیكەی مەككە و مەدینە و تەواوی هۆكارەكانی گواستنەوەیان ڕێكخستووە.

هەروەها رایگەیاندووە، پاس و شەمەندەفەر و هۆكارەكانی دیكەی گواستنەوەیان بە زیادەوە بۆ حاجییان دابینكردووە، بۆ ئەوەی حاجییان بەبێ چاوەروانی و بە خێرایی پێویست بگەنە ئەو شوێنەی كە دەیانەوێت سەردانی بكەن.