ئیسرائیل: بۆ لەناوبردنى هەزاران مووشەکى ئێران هێرشەکانمان بەردەوام دەبێت

پەیام 

لەگەڵ بۆردومانە موشەكییەكانی ئێراندا؛ سوپای زایۆنیش رایگەیاند، سەكۆیەكی موشەكییان لە باشووری تاران وێرانكردووە، هەروەها چەند ئامانجێكی دیكەیان لەناو تاراندا بۆردومانكردووە. بەرپرسێکى باڵاى ئیسرائیلیش دەڵێت: بۆ لەناوبردنى هەزاران مووشەکى ئێران هێرشەکانیان بەردەوام دەبێت.

سوپای قەوارەی داگیركەری زایۆنی بڵاویكردەوە، بۆ یەكەمجار بنكەی هەڵدانی مووشەكییان لە باشووری تاران بۆردومانكردووە، كە لەوێوە مووشەكەكان ئاڕاستەی ئیسرائیل كراوە، هەروەها راشیگەیاندووە، بارەگای سەرەكی فەیلەقی قودسیان لە تاران بۆردومانكردووە.

لە هەمانكاتدا ئاژانسی میهری ئێران بڵاویكردەوە، سیستمی بەرگریی ئاسمانیی ئێران توانیویەتی درۆنێكی زایۆنی لە شاری دیهلەران لە پارێزگای ئیلام لە رۆژاوای وڵات بخاتە خوارەوە.

هاوكات، سوپای پاسدارانی ئێران رایگەیاندووە، دوو لە چەكدارەكانیان لە ئاكامی بۆردومانی زایۆنیدا لە ناوچەی ئیگروود لە پارێزگای زەنجان لە رۆژئاوای ئێران كوژراون.

هەروەها سەرۆكی ئەنجوومەنی ئاسایشی نیشتیمانی زایۆنی رایگەیاند، هێرشەكانیان بۆسەر ئێران بەردەوام دەبێت، چونكە ئێران خاوەنی هەزاران مووشەكی بالیستییە كە مەترسییە بۆسەر ئیسرائیل.

بەرپرسە زایۆنییەكە وتووشیەتی، ئامانجی ئەوان ڕووخاندنی ڕژێمی ئێران نیە، بەڵكو دەیانەوێت توانای ئەتۆمی ئێران لەناو ببەن.