ڕادیۆ و تەلەفزیۆنی ئێران لە كاتی پەخشی ڕاستەوخۆدا بە ئامانج گیرا

پەیام 

دوای چەند كاتژمێرێك لە هۆشدارییەكی، قەوارەی زایۆنی یەكێك لە باڵەخانەكانی تەلەفزیۆنی فەڕمیی كۆماری ئیسلامی ئێرانی لە ناوچەی سێی تاران، بە ئامانج گرت.

لە كاتژمێرەكانی ڕابردوودا و لە كاتی پەخشی ڕاستەوخۆدا سوپای زایۆنی بۆردومانی یەكێك لە باڵەخانە شووشەییەكانی دەزگای ئێزگە و تەلەفزیۆنی كۆماری ئیسلامی ئێرانی لە ناوچەی سێی تارانی پایتەخت كرد كە لە چەند كاتژمێری ڕابردوودا هۆشداری بڵاو كردبووەوە و داوای چۆڵكردنی كردبوو.

ئەو باڵەخانەی بە ئامانج گیرا تۆڕی هەواڵی تێدا بوو، بەپێی زانیاریی ئاژانسی تەسنیم بە چوار بۆمب بۆردومان كراوە و تائێستاش ئاماری قوربانییەكان ئاشكرا نییە.

دوای چەند خولەكێك لە وەستانی، پەخشی كەناڵەكە تا ڕادەیەك ئاسایی بووەوە و تۆڕی هەواڵی لە ستۆدیۆ یەدەگەكانیدا دەستی بە پەخش كردەوە و بێژەرەكەی بەناوی سەحەر ئیمامی كە لەكاتی بۆدرومانەكەدا لە پەخش بوو، گەڕاوەتەوە بۆ پەخش.

لەبارەی ڕووداوەكەوە، یونس شادلو سەرنووسەری تیمی بەرگریی تەلەفزیۆنی فەرمی ئێران ڕایگەیاند: پێشتر پێیان وتراوە ناوچەی سێی تاران كە باڵەخانەكەیانی تێدایە چۆڵ بكرێت، بەڵام ماونەتەوە تا وێنەی بەهێزیی وڵاتەكەیان بە جیهان نیشان بدەن.

لە بەرانبەر هێرشەكاندا سوپای پاسدارانی ئێران ڕایگەیاند: سەرتاپای قەوارەی زایۆنی لە ئاگر هەڵدەكێشن.

ئاژانسی هەواڵی فارسیش بڵاوی كردەوە "ئێران لە حاڵەتی ئامادەكاری بۆ گەورەترین و تووندترین هێرشی مووشەكیی مێژووییە، بە خاكی قەوارەی زایۆنی".