27/06/2025
273 جار خوێنراوەتەوە
ئەمریكا دەیەوێت لەڕێى سوككردنی سزاکانیەوە، ئێران بۆ دانوستانەكان بگەڕێنێتەوە
پەیام
ئەمریكا دەیەوێت لەڕێى سوككردنی ئەو سزایانەى بەسەر ئێراندا سەپێندراون، ئەو وڵاتە بگەڕێنێتەوە بۆ سەر مێزی دانوستانەكان.
ئەمریكا بەنیازە لە گیرفانی وڵاتانی عەرەبی و بۆ بنیاتنانی بەرنامەی ئەتۆمیی مەدەنییانەی ئێران بە بڕی 30 ملیار دۆلار هاوكاریی پێشكەش بەو وڵاتە بكات.
تۆڕی هەواڵیی سی ئێن ئێن لە زاری چەند سەرچاوەیەكی نزیك لە ئیدارەی ترەمپ ئاماژەی بەوە كردووە، ئیدارەی ئەمریكا پرسی سوككردنی سزا و ئازادكردنی ملیاران دۆلاری سڕكراوی ئێرانی تاووتوێ كردووە، لەگەڵ هاوكاریكردنی ئەو وڵاتە بە بڕی 30 ملیار دۆلار.
باسی لەوەش كردووە "ئەم هەنگاوەی ئیدارەی ترەمپ بۆ ئەوەیە ئێران بگەڕێنێتەوە سەر مێزی دانوستانەكان".
ئەو سەرچاوانە ڕوونیان كردووەتەوە، چەند لایەنێكی چالاكی ئەمریكا و ڕۆژهەڵاتی ناوەڕاست، بەنهێنی لەگەڵ ئێرانییەكان كۆبوونەتەوە تەنانەت لەكاتی شەڕی ئێران و قەوارەی زایۆنیشدا، دەشڵێن: ئەو گفتوگۆیانە ئەم هەفتەیەش بەردەوام بوون دوای ئەوەی هەریەك لە ئێران و قەوارەی زایۆنی گەیشتنە ئاگربەست.
هاوكات سی ئێن ئێن باسی لەوە كردووە، بەشێك لە وردەكاری ئۆفەرەكەی ئەمریكا بۆ ئێران لە كۆبوونەوەیەكی نهێنیدا لە كۆشكی سپی تاووتوێ كراوە، ئەمەش یەك ڕۆژ بەرلە هێرشەكانی ئەمریكا بۆ سەر دامەزراوە ئەتۆمییەكانی ئێران.
بەرپرسانی ئیدارەی ترەمپ دووپاتیان كردووەتەوە، پێشنیازەكە سەرەتاییە و دەكرێت گۆڕانكاری تێدا بكرێت، بەڵام خاڵی نەگۆڕ و چەسپیو ئەوەیە، ئێران نابێت بە هیچ شێوەیەك یۆرانیۆم بپیتێنێت.
لە تۆڕە کۆمەڵایەتیەکان شەیری بکە