ئەوروپییەكان وێڕای ڕەخنەكانی ترەمپ پشتیوانی لە زیلینسكی دەكەن

پەیام 

سەركردەی وڵاتە زلهێزەكانی ئەورووپا لە دیدارێكدا لەگەڵ ڤۆلۆدیمێر زیلینسكی، سەرۆكی ئۆكرانیا، جارێكی دیكە پشتیوانیی خۆیان بۆ كیێڤ دووپات كردەوە و هاوكات گومانیان لە بەشێك لە وردەكارییەكانی پێشنیازە نوێیەكەی ئەمەریكا بۆ كۆتاییهێنان بە جەنگ لەگەڵ ڕووسیا نیشان دا.

دوای ئەوەی دۆناڵد ترەمپ سەرۆكی ئەمریكا ڕەخنەی توندی لە زیلینسكی گرت و وتی ڕەشنوسەكەی نەخوێندووتەوە، سەركردەی وڵاتانی ئەورووپا كە بریتی بوون لە بەریتانیا، فەرەنسا و ئەڵمانیا لەگەڵ زیلنسكی كۆبوونەوەیەكی دوو كاتژمێریان ئەنجامدا.

فریدریك مێرتس ڕاوێژكاری ئەڵمانیا بە ڕاشكاوی گومانی خۆی لەبارەی هەندێك بەڵگەنامەی ئاشتی ئەمەریكی دەربڕی و ماكرۆنیش جەختی لە گرنگیی لێكنزیكردنەوەی هەڵوێستی ئەوروپا و ئەمەریكا و ئۆكرانیا كردەوە. 

زیلینسكیش ئاماژەی بەوە دا كە هەندێك بڕیار بەبێ ئەمەریكا و هەندێكی تر بەبێ ئەوروپا نادرێن، بۆیە دەبێت بڕیاری گرنگ بدەن.

لەلایەكی دیكەوە، سەرۆك وەزیرانی بەریتانیا ڕایگەیاند كە هیچ گوشارێك لەسەر زیلینسكی دروست ناكات و ئامانجیان گەیشتنە بە ئاشتییەكی دادپەروەرانە و بەردەوام.