لە ڕووداوێكی هاتووچۆی كارەساتباردا 18 كچی گوندێكی میسر گیانیان لە دەست دا

پەیام 

لە ڕووداوێكی هاتوچۆی قورس و كارەساتباردا لەسەر ڕێگەی هەرێمی ناوەندی ئەشمون لە پارێزگای مەنوفیە لە دەلتای میسر 19 كەس گیانیان لە دەست دا كە 18یان كچ بوون و بەڕێگاوە بوون بۆ كار.

ڕووداوەكە دوێنێ، هەینی ڕوویداوە، بە پێی ڕاگەیاندنەكانی میسر، تەنكەرێك خۆی كێشاوە بە مینی پاسێكدا كە ژمارەیەك كچی تێدابووە و بە ڕۆژانە كاریان كردووە، لە گوندەكەی خۆیانەوە بۆ شوێنی كارەكەیان لە دەلتای نیل ڕۆیشتوون، لە ئەنجامی ڕووداوەكەش 18 كچی گوندەكە و شۆفێری مینی پاسەكە گیانیان لەدەست داوە. 

بەپێی لیست و تەمەنی قوربانییەكانیش كە دەزگا ڕاگەیاندنە فەڕمییەكان بڵاویان كردووەتەوە، تەمەنی كچەكان لەنێوان 14 بۆ 22 ساڵدایە و دەزگا ڕاگەیاندنەكان بە شەهیدانی "پارووە نان" ناوزەندیان كردوون. 

شۆفێری تەنكەرەكە لەلایەن هێزە ئەمنییەكانەوە دەستگیر كرا و لایەنە پەیوەنددارەكانیش لێكۆڵینەوەی فراوانیان لە ڕووداوەكە دەستپێكرد، پرسەی 18 كچەكەش بەكۆمەڵ و لە دیمەنێكی شكۆمەندانەدا لە گوندەكەی خۆیان، بەڕێوەچوو. 

بەپێی ئامارە فەڕمییەكان ساڵی ڕابردوو پێنج هەزار و 260 كەس بە ڕووداوی هاتوچۆ لە میسر گیانیان لەدەست داوە.