13 کاتژمێر پێش ئێستا
96 جار خوێنراوەتەوە
دادگای فیدڕاڵی بڕیاردانی لەبارەی مووچەی مووچەخۆرانی هەرێم دواخست
پەیام
دادگای باڵای فیدراڵیی عێراق جارێكی دیكە دانیشتن و بڕیاردانی دەربارەی دوو سكاڵا لەسەر مووچەی مووچەخۆرانی هەرێمی كوردستان دواخست.
بڕیاربوو ئەمڕۆ دادگای فیدڕاڵی لەبارەی دوو سكاڵای تایبەت بە مووچەی مووچەخۆرانی هەرێمی كوردستان كۆ ببێتەوە و بڕیار بدات، بەڵام بەپێی ماڵپەڕیی فەرمیی دادگا، دانیشتنەكە بۆ 28 ی تەمموز دواخراوە.
ئەو دوو سكاڵایەی لە دادگای فیدڕاڵی تۆمار كراون، یەكەمیان لەسەر وەزیری دارایی و ئابووریی حكومەتی فیدڕاڵی تۆمار كراوە، بەهۆی نەبوون و دابەشنەكردنی مووچەوە، كە تیایدا دوو سكاڵاكار داوا دەكەن گرەنتیی خەرجكردنی مووچەی فەرمانبەرو خانەنشینانی هەرێم مانگانە لەكاتی خۆیدا بدرێت.
ئەو دوو سكاڵاكارە كە فەرمانبەری هەرێمن و زیانمەندی نەبوونی مووچەن، داوا دەكەن دادگای فیدڕاڵی فەرمانسالارییەك دەربكات بۆ ئەوەی حكومەتەكانی فیدڕاڵی و هەرێم ناچار بە خەرجكردن و دابەشكردنی مووچە بكات تا یەكلابوونەوەی سكاڵاكە.
سكاڵای دووەم لەلایەن سێ مامۆستای ناڕازییەوە لەسەر سەرۆكی ئەنجوومەنی وەزیران و وەزیری دارایی عێراق تۆمار كراوە و تیایدا داوا دەكەن، دادگای فیدڕاڵی فەرمان بكات بە دوورخستنەوەی مووچەی فەرمانبەران لە هەرێمی كوردستان لە هەر ململانێیەكی سیاسی و ڕێككەوتنێكی نێوان هەرێم و بەغداد.
هەرچەندە مووچەخۆرانی هەرێم چاوەڕوانن دادگای فیدڕاڵی لە بەرژەوەندیی ئەوان بڕیار بدات بەڵام ئەمە دووەمجارە دادگا دانیشتن و بڕیاردان لەوبارەیەوە دوادەخات و نازانرێت ئایا 28 ی ئەم مانگەش بڕیار دەدات یان جارێكی دیكە بڕیاردان دوادەخات.
لە تۆڕە کۆمەڵایەتیەکان شەیری بکە