لیژنەی دارایی نوێنەرانی عێراق: مووچەی ئەمساڵی فەرمانبەران و خانەنشینان دابین و مسۆگەرە

پەیام

لیژنەی دارایی لە ئەنجومەنی نوێنەرانی عێراق ڕایگەیاند: سەڕای دابەزینی نرخی نەوت، دابینكردنی مووچەی فەرمانبەران و خانەنشینان تا كۆتایی ئەمساڵ مسۆگەرە.

لە لێدوانێكیدا بۆ ئاژانسی هەواڵی عێراق، موعین كازمی ئەندامی لیژنەی دارایی لە ئەنجومەنی نوێنەران ڕایگەیاند: بەردەوامبوون لە هەناردەكردنی سێ ملیۆن و 400 هەزار بەرمیل نەوت لە ڕۆژێكدا، بە نرخی 65 دۆلار، كورتهێنانی پێنج دۆلار بۆ هەر بەرمیلێك دروست دەكات، بە لەبەرچاوگرتنی ئەوەی بودجەی سێ ساڵە لەسەر بنەمای 70 دۆلار بۆ هەر بەرمیلێك حیسابی بۆ كراوە.

كازمی ڕوونیشی كردەوە "دەتوانرێت ئەو كورتهێنانە بە زیادكردنی داهاتی نانەوتی، بە چالاككردنی سەرچاوەكانی باج و گومرگ و پەیوەندییەكان و كۆكردنەوەی باج لە وەزارەتەكانی كارەبا و شارەوانییەكان و ناوخۆ و ئەوانی دیكە، چارەسەر بكرێت".

بە وتەی ئەو ئەندامەی لیژنەی دارایی "دەتوانرێت داهاتی نانەوتی بگەیەنرێتە 20 ترلیۆن دینار، لەگەڵ داهاتی 120 ترلیۆن دیناری نەوت، بە گشتی بگاتە 140 ترلیۆن دینار، ئەمەش بەسە بۆ بەڕێوەبردنی كارەكانی حكومەت".

وتیشی: "مووچەی فەرمانبەران و خانەنشینان بۆ ساڵی 2025 بە تەواوی مسۆگەرە".

بەپێی قسەی موعین كازمی، حكومەت هەوڵ دەدات مانگانە 9 تریلیۆن دینار بۆ مووچەی چوار ملیۆن و 200 هەزار فەرمانبەر، سێ ملیۆن خانەنشین و دوو ملیۆن تۆڕی چاودێری كۆمەڵایەتی دەستەبەر بكات.