وەزارەتی سامانە سرووشتییەكان: هێرش دەکرێتە سەر ژێرخانی ئابووریی هەرێم

په‌یام
وەزارەتی سامانە سرووشتییەكانی هەرێمی کوردستان-عێراق ڕایگەیاند، بە دوو دڕۆنی بۆمبڕێژکراو، كێڵگەی نەوتی خۆرمەڵە لە پارێزگای هەولێر کراوەتە ئامانج.
وەزارەتەکە لە ڕاگەیاندراوێکدا بڵاوی کردووەتەوە کە، "ئێوارەی ڕۆژی دووشەممە ١٤ی تەمووزی ٢٠٢٥ لە كاتژمێر ٨:٢٠ و ٨:٢٥ خوولەک، لە ڕێگەی دوو درۆنی بۆمبڕێژكراو هێرش كرایە سەر كێڵگەی نەوتی خۆرمەڵە لە پارێزگای هەولێر".
ڕاشیگەیاندووە، "هێرشەکە هیچ زیانێكی گیانی نەبووە و تەنیا زیانی بە بۆرییەکانی ئاوی وێستگەکە گەیاندووە".
لە ڕاگەیاندراوەکەدا وەزارەتی سامانە سرووشتییەكانی هەرێمی کوردستان وێڕای شەرمەزارکردنی هێرشەکە، ئاماژەی بەوەداوە کە هێرشەکە مەبەست لێی بە ئامانجگرتنی ژێرخانی ئابووریی هەرێمی کوردستانە.