جەنگی سەر غـ.ەززە بەردەوامە و ئەمڕۆیش دەیانی دیكە شەهید و بریندار بوون

پەیام 

جەنگی سەر كەرتی غەززە بەردەوامە و ئەمڕۆیش دەیان كەسی دیكە شەهید و بریندار بوون.

ئەمڕۆ 659 ڕۆژ لە جەنگی ناڕەوای سوپای قەوارەی زایۆنی دژی هاووڵاتیانی كەرتی غەززەی فەڵەستین تێپەڕی و بەپێی زانیارییەكانیش لە بەرەبەیانی ئەمڕۆوە 51 فەڵەستینی شەهید بوون كە 23یان لە نێو نۆرەی وەرگرتنی هاوكارییەكاندا بوون.

لای خۆیشیەوە، وەزارەتی تەندروستیی غەززە بڵاوی كردووەتەوە "لە 24 كاتژمێری ڕابردوودا 57 شەهید كە سیانیان ڕووفات بوون لەگەڵ 512 بریندار گەیەنراونەتە نەخۆشخانەكان و هێشتایش ژمارەیەكی زۆر لە قوربانییان لەژێر داروپەرودووەكاندا ماونەتەوە".

بەپێی ئەوەی وەزارەتی تەندروستییش بڵاوی كردووەتەوە "ئاماری قوربانییان لە حەوتی ئۆكتۆبەری 2023ەوە گەیشتە 59 هەزار و 733 شەهید و 144 هەزار و 477 بریندار كە زیاتر لە 40 هەزاری لە دوای 18ی ئادار، مانگی سێ و شكانی ئاگربەستەوە بووە".

ئەوەیش خراوەتەڕوو لە 24 كاتژمێردا 23 شەهید و زیاتر لە 165 بریندار لە نۆرەی وەرگرتنی هاوكارییەكاندا گەیەنراونەتە نەخۆشخانەكان، بەمەیش ئاماری شەهیدانی ناسراو بە "پارووی ژیان" گەیشتووەتە هەزار و 121 و بریندارەكانیش حەوت هەزار و 485ی تێپەڕاندووە.