پەیامێک لە ڕاشفۆردەوە بۆ هانسی فلیک

پەیام سپۆڕت - بڕیار تەها

مارکوس ڕاشفۆردی ئینگلیزی و ‌هێرشبەری نوێی یانەی بەرشەلۆنە ڕایدەگەیەنێت، دەتوانێت لە چەندین شوێنی جیاوازی یاریگا یاری بکات و نیگەران نییە لەوەی تاکو ئێستا ناوەکەی لە ڕێكخراوی لالیگا تۆمار نەکراوە. 

 ڕۆژنامەی موندۆ دیپۆڕتیڤۆی کەتەلۆنی نوێترین لێدوانی ڕاشفۆردی بڵاو کردووەتەوە  و ئەو یاریزانە سەبارەت بە تۆمارنەکردنی ناوەکەی لە لالیگا دەڵێت: نیگەران نیم لەبارەی تۆمارنەکردنی ناوەکەم لە لیستی یاریزانەکان،  پێم وایە ئەمە شتێکە پەیوەندی بە یانەکەوە هەیە، و دڵنیام کە چارەسەر دەکرێت، تەواوی سەرنجم لەسەر ڕاهێنانەکان و خۆئامادەکردنە بۆ دەستپێکی وەرز.

لە بەردەوامی قسەکانیدا هێرشبەرەکەی بلاوگرانا وتی: هەمووان لێرە ئارەزووی بردنەوەی خولی یانە پاڵەوانەکانی ئەوروپا دەکەن، وەرزی ڕابردوو نایاب بوو، و ئێستا پێویستە هەوڵ بدەین دووبارەی بکەینەوە و بە بردنەوەی نازناوەکە باشتری بکەین.

لە کۆتایدا ڕاشفۆرد دەڵێت: دەتوانم لە چەندین شوێنی جیاواز یاری بکەم، و لە هەموو شوێنێکی یاریگاوە گۆڵ تۆمار بکەم، گرنگ ئەوەیە کە لە بارودۆخە جیاوازەکاندا کاریگەر بم، لە بەرشەلۆنە زۆر یاریزانی گەورە هەن، و پێش ئەوەی پەیوەندی بکەم ئەوەم دەزانی، کوالێتییەکە تیپەکە زۆر بەرزە، هەروەها توندی لە ڕاهێنانەکاندا هەیە، ئەمەش ئەوەیە کە پێویستە بە درێژایی وەرز پارێزگاری لێ بکەین.