بەرشەلۆنە لە ئانچلۆتی تووڕەیە

پەیام سپۆڕت - بڕیار تەها

یانەی بەرشەلۆنەی کەتەلۆنی لە کارلۆ ئانچلۆتی ڕاهێنەری پێشووی ڕیاڵ مەدرید و ئێستای هەڵبژاردەی بەڕازیل تووڕەیە.

 لە چەند ڕۆژی ڕابردوو ئانچلۆتی لیستی یاریزانەکانی بەڕازیلی بۆ دوو یاری داهاتووی هەڵبژاردەکە بەرانبەر بۆلیڤیا و چیللی ڕاگەیاند، ئەوەی جێگەی سەرنج بوو، ئەو لیستە یاریزانی ڕیاڵ مەدرید تیا نەبوو، نە میلیتاو، نە ڤینیسیۆس، نە ڕۆدریگۆ بانگهێشت نەکراون، بەڵام ڕافینیای هێرشبەری بەرشەلۆنە لە لیستەکەدایە.

 ڕۆژنامەی سپۆرتی کەتەلۆنی زانیاری بەدەست گەیشتووە، بەرپرسانی بەرشەلۆنە لەم کارەی ئانچلۆتی نیگەران و تووڕەن، پێیانوایە ئانچلۆتی بە دوورخستنەوەی یاریزانانی ڕیاڵ مەدرید بۆ ئەو دوو یارییە هاوکاریکردن و کارئاسانییە بۆ یانە مەدریدییەکە تائەوەی یاریزانەکانی قەڵای سپی لەگەڵ یانەکانیان بمێنێتەوە و ئامادەکاری زیاتر بۆ ڕکابەرییەکانی لالیگا بکەن و لە ماندووبوونی گەشتکردن بۆ ئەمریکای باشووریش ڕزگاریان ببێت.

سەرچاوەکە باس لەوەش دەکات، بەرپرسانی بەرشەلۆنە دەڵێن؛ بەو پێیەی بەڕازیل سەرکەوتنی بۆ مۆندیال مسۆگەر کردووە، دەیتوانی پشوو بە ڕافینیا بدات و ئەو یاریزانەش بانگهێش نەکات، هەر لەبەرئەوەش یانە کەتەلۆنییەکە بەنیاز داوا لە یەکێتی تۆپی پێی بەڕازیل بکات، ڕافینیا تەنیا بۆ یاریی چیللی یاری بکات و دواتر بەشداری یارییەکەی بۆلیڤیا نەکات و زووتر بگەڕێتەوە کەتەلۆنیا.

هەڵبژاردەی بەڕازیل لە میانەی پالاوتنەکانی گەیشتن بە مۆندیال لە پێنچی مانگی داهاتوو میوانداری چیللی دەکات و لە 10ی هەمان مانگیشدا دەبێتە میوانی بۆلیڤیا.