فلیک: هیچ بەڵێنییەک نادەم

پەیام سپۆڕت - مەڕوان تاڵیب

هانسی فلیکی ڕاهێنەری یانەی بەرشەلۆنە ڕەتی دەکاتەوە هیچ بەڵێنییەک بە تێر شتیگنی گۆڵپارێز بدات و ستایشی ئاستی خوان گارسیاش دەکات.

 لەمیانەی بەشداریکردنی لە مەڕاسیمی خەڵاتەکانی ڕۆژنامەی سپۆڕت بێڵد، کە فلیک وەک باشترین ڕاهێنەری ساڵ دەستنیشان کرا، سەرەتا ڕاهێنەرە ئەڵمانییەکە وتی: لە ڕووی ئەنجامەکانەوە وەرزەکە بەباشی دەڕوات، بەڵام لە ئاستی تیپەکەم ڕازی نیم، بە تەواوی متمانەم بە شتانە هەیە کە دەتوانم پێشکەشی بکەم و لەلایەن ستافێکی بەهێزی ڕاهێنەرایەتییەوە دەورە دراوم.

لە بەشێکی دیکەی قسەکانی فلیک دەشڵێت: گۆڵپارێزێکی لاو و بە توانامان هەیە و خوان گارسیا گەیشتووەتە ئاستێکی زۆر بەرز و هەمووان بڕیاریانداوە کە دەبێتە داهاتووی بەرشەلۆنە.

ڕاهێنەرەکەی بلاوگرانا ئەوەش دەخاتەڕوو، گەڕانەوەی شتیگن زۆر گرنگە و گۆڵپارێزێکی نایابە و پشتگیری تەواوی دەکەن تاکو باشترین ئاستی خۆی بەدەست بهێنێتەوە، بەڵام لە ئێستادا هیچ بەڵێنییەکی پێنادات سەبارەت بە یاریکردنی لە داهاتوودا.

لە کۆتایدا فلیک ستایشی لامین دەکات و ئاماژەی بەوەکرد، ناکرێت هیچ یاریزانێک بەراورد بە یەماڵ بکرێت، چونکە ئەستێرەیەکی ڕاستەقینەیە و تەنیا تەمەنی 18 ساڵە و لەسەر ڕێگایەکی دروست هەنگاو دەنێت، بەڵام پێویستە بەردەوام بێت لە فێربوون لە یاریزانانی دیکەوە و پشتیگری تەواوی دەکەن و بڕوای وایە دەبێتە یەکێک لە باشترین یاریزانەکانی جیهان لە داهاتوویەکی نزیکدا.