کرووس هۆشداری بە چابی ئالۆنسۆ دەدات

پەیام سپۆڕت - مەڕوان تاڵیب

تۆنی کرووسی ئەڵمانی هۆشداری بە چابی ئالۆنسۆی ڕاهێنەری یانەی ڕیاڵ مەدرید دەدات کە هەڵەکانی ڕاهێنەرانی پێشوو دووبارە نەکاتەوە.

 لەمیانەی لێدوانێکی ڕۆژنامەوانیدا، سەرەتا کرووس وتی: کێشەی وەرزی ڕابردوومان ئەوەبوو نەماندەتوانی لە تیپە بەهێزەکان ببەینەوە، ئەوەش شتێکی نائاساییە، ئەم وەرزەش بردنەوەی نازناوەکان بۆ ڕیاڵ ئاسان نییە، چونکە بەرشەلۆنە هێشتا بەهێزە و لە چامپیۆنسلیگیش یانەکانی لیڤەرپووڵ و پاریس و مانچستەر سیتی و بایرن و ئارسیناڵ ڕکابەری دەکەن، پێویستە ئالۆنسۆ ئاستی تیپەکە باشتر بکات.

لە بەشێکی دیکەی قسەکانی تۆنی ئەوەش باس دەکات، متمانە بۆ ڕاهێنەر گرنگە و ئاسانکاری دەکات بۆ زاڵبوون بەسەر ئەنجامە خراپەکان و هەندێکجار ڕاهێنەر دوای چوار شکست دوور دەخرێتەوە، دۆخی ئالۆنسۆ بەراورد بە لوپیتێگی ڕاهێنەری پێشووی مێرنگی جیاوازە، چونکە چابی یاریکردنی بۆ ڕیاڵ و ئامارەکانی یارمەرتی دەدەن، بەڵام ئەوە نات پارێزێت کاتێک ماوەی چەند ساڵێک نازناو نەبەیتەوە بێگومان دوور دەخرێتەوە.

لە کۆتایدا کرووس جەختی لەوە کرد، گۆڕانکاری تەواو لە دڵی بەرگری ڕیاڵ هەیە، هاوسن لە تۆپە هەواییەکان بەهێزە و خێرا و نایابە و پێیوایە وەرزەکە باشتر دەبێت، گرنگترین شت لە ڕیاڵ ئەوەیە کەس هەست بە دڵنیایی یاریکردنی بەردەوام ناکات لە پێگەی خۆیدا و گۆڕانکارییەکان بەردەوام ڕوو دەدەن.