ئیسحاق هەنگاوی کرداری دەبێت بۆ یەکلاکردنەوەی داهاتووی لەم هاوینەدا

پەیام سپۆڕت - بڕیار تەها

ئالێکساندەر ئیسحاقی سویدی و هێرشبەری یانەی نیوکاسڵ یونایتدی ئینگلیزی، بۆ یەکلاییکردنەوەی داهاتووی بڕیاریداوە لەگەڵ بەرپرسانی یانەکەی کۆببێتەوە.

 یانەی لیڤەرپوولی ئینگلیزی بە پەرۆشەوە ئارەزووی گواستنەوەی ئەو هێرشبەرە دەکات، بەڵام نیوکاسڵ ڕەتی دەکاتەوە دەستبەرداری بێت.

میدیاکانی بەڕیتانیا ئاشکرای دەکەن، یاریزانەکە داوای کۆبوونەوەی لەگەڵ بەرپرسانی نیوکاسڵ کردووە لەم هەفتەیەدا، بۆ ئەوەی چارەنووسی خۆی لەگەڵ تیپەکە لە گواستنەوەی هاوینەی ئێستادا دیاری بکات.

ئیسحاق ئەمڕۆ دووشەممە گەڕایەوە بۆ مەشقەکانی یانەی نیوکاسڵ، ئەمەش دوای گەڕانەوەی یانەکە لە گەشتی ئامادەکاریی ئاسیا کە هێرشبەرە سویدییەکە بەهۆی پێکانەوە لێی بێ بەش بوو.

یانەی لیڤەرپووڵ چاوەڕوانی کۆبوونەوەکەی ئیسحاق لەگەڵ نیوکاسڵ دەکات و دەنگۆی ئەوە هەیە کە یانە سوورپۆشەکە بڕی 120 ملیۆن یۆرۆی بۆ گواستنەوەی هێرشبەرە سویدییەکە پێشکەش کردووە ، بەڵام ئۆفەرەکە لەلایەن نیوکاسڵەوە ڕەتکراوەتەوە و داوای 150 ملیۆن یۆرۆ دەکات.

لەگەڵ ئەوەشدا، لیڤەرپوڵ وازی لە هەوڵەکانی نەهێناوە، بە وپێیەی یاریزانەکە خۆی خواستی پەیوەندیکردنی بە لیڤەرپوڵەوە هەیە، کۆبوونەوەی یاریزانەکە لەگەڵ بەرپرسانی نیوکاسڵدا بۆ داهاتووی یەکلاکەرەوە دەبێت.