"بانكی ناوەندیی عێراق لە میكانزمی پڕۆسەی گواستنەوە و ئاڵوگۆڕی دۆلار سەركەوتوو بووە"

پەیام

پارێزگاری بانكی ناوەندیی عێراق ڕایگەیاند: میكانزمی پڕۆسەی گواستنەوە و ئاڵوگۆڕی دۆلار لەلایەن بانكی ناوەندییەوە سەركەوتوو بووە و ستایشی نێودەوڵەتی بەدەست هێناوە.

عەلی عەلاق، پارێزگاری بانكی ناوەندیی عێراق لە لێدوانێكی تایبەتدا بۆ ڕۆژنامەی سەباحی فەڕمی، ڕایگەیاند: هەوڵەكانی عێراق لە بواری ڕێكخستنی پڕۆسەكانی گواستنەوەی دۆلاردا، ستایش و پێزانینی لایەنە نێودەوڵەتییەكانی بەدەست هێناوە.

عەلاق جەختیشی كردەوە عێراق "تاكە" لە جێبەجێكردنی ئەم جۆرە پرۆسانەدا، ئەمەش سەركەوتنی ئەو ڕێكار و سیاسەتانە دەسەلمێنێت كە بانكی ناوەندی بە ئامانجی كۆنترۆڵكردن و پەرەپێدانیان بەپێی ستانداردە جیهانییەكان، گرتوویەتییە بەر.

ئەم لێدوانەی پارێزگاری بانكی ناوەندی لەكاتێكدایە بانكەكە لە هەوڵەكانی بۆ بەدەستهێنانی سەقامگیریی دارایی و بەهێزكردنی متمانەی كۆمەڵگەی نێودەوڵەتی بە سیستەمی بانكیی عێراق، لە چوارچێوەی هەنگاوە چاكسازییەكانی عێراق بۆ شەفافكردنی جووڵەی دۆلار و ڕێگریی لە بەكارهێنانی بۆ مەبەستی نایاسایی، بەردەوامە.