.jpg)
15 کاتژمێر پێش ئێستا
114 جار خوێنراوەتەوە
كۆمیسیۆن دواین واده‌ی بۆ پڕكردنه‌وه‌ی شوێنی كاندیده دوورخراوه‌كان دیاریكرد
كۆمیسیۆنی باڵای سه‌ربه‌خۆی هه‌ڵبژاردنه‌كان ڕۆژی چواره‌می ئه‌یلوولی داهاتوویی وه‌ك دوا واده دیاریكرد بۆ گۆڕینی كاندیده دوورخراوه‌كان له‌لایه‌ن پارت و هاوپه‌یمانییه‌كانه‌وه.
نه‌براس ئه‌بو سه‌وده، یاریده‌ده‌ری وته‌بێژی ڕاگه‌یاندنی كۆمیسیۆن ڕایگه‌یاند، كه دۆسیه‌ی دوورخستنه‌وه هێشتا كراوه‌یه تا لایه‌نه په‌یوه‌ندیداره‌كان كاره‌كانیان له چوارچێوه‌ی ماوه یاساییه‌كاندا ته‌واو ده‌كه‌ن.
هۆكاره‌كانی دوورخستنه‌وه‌ی كاندیده‌كان فره‌جۆرن و بریتین له: دوورخستنه‌وه‌یان به ڕێكاره‌كانی لێپرسینه‌وه و دادپه‌روه‌ری، نه‌بوونی مه‌رجی ڕه‌وشتباشی و هه‌ڵسوكه‌وتی باش، بوونی بڕیاری دادوه‌ری یه‌كلاكه‌ره‌وه دژیان، پێشێلكارییه‌كانی په‌یوه‌ست به ڕێژه‌ی خاوه‌ن بڕوانامه ئاماده‌ییه‌كان (كه نابێت له 20% تێپه‌ڕێت) و ڕێژه‌ی نوێنه‌رایه‌تیی ژنان (كه لایه‌نی كه‌می 25%ه)، هه‌روه‌ها ساخته‌كردنی بڕوانامه‌ی خوێندن له لای هه‌ندێك كاندیده‌كان.
كۆمیسیۆن ڕێگه به پارت و هاوپه‌یمانییه‌كان ده‌دات كه له ماوه‌ی سێ ڕۆژدا كاندیده دوورخراوه‌كانیان بگۆڕن، به‌و مه‌رجه‌ی ئه‌م پرۆسه‌یه دوای ڕۆژی چواره‌می ئه‌یلوول ڕابگیرێت. هه‌روه‌ها، مافی تانه‌لێدان بۆ كاندیده دوورخراوه‌كان دابین كراوه كه ده‌توانن له ماوه‌ی سێ ڕۆژدا له‌به‌رده‌م ده‌سته‌ی دادوه‌ری هه‌ڵبژاردنه‌كان تانه له بڕیاره‌كه بده‌ن.
پرۆسه‌ی وردبینی كاندیده‌كان به هاوكاری چه‌ندین لایه‌نی حكومی ئه‌نجام ده‌درێت، له‌وانه ده‌سته‌ی لێپرسینه‌وه و دادپه‌روه‌ری، وه‌زاره‌تی ناوخۆ، وه‌زاره‌تی به‌رگری، ده‌سه‌ڵاتی دادوه‌ری، و هه‌ردوو وه‌زاره‌تی خوێندنی باڵا و په‌روه‌رده، بۆ دڵنیابوونه‌وه له ڕاستی و دروستی به‌ڵگه‌نامه و زانیارییه پێشكه‌شكراوه‌كان.
لە تۆڕە کۆمەڵایەتیەکان شەیری بکە