پۆڵ بریمەر: لە عێراق ئەوانەى مامەڵەم لەگەڵ کردن پارەویست بوون نەک سیاسی

پەیام 

پۆڵ بریمەر حاكمی مەدەنیی ئەمریكا لە عێراق ڕەتیدەكاتەوە، لە دوای ڕووخانی ڕژێمی بەعس مامەڵەی لەگەڵ كۆمەڵێك سیاسی كردبێت و دەڵێت لەگەڵ كۆمەڵێك كەسی بێئەزموون و پارەویست مامەڵەم كردووە.

پۆڵ بریمەر یەكەم حاكمی مەدەنیی ئەمریكا لە عێراق كە تەمەنی فەرمانڕەواییەكەی ساڵێكی خایاند، لە چاوپێكەوتنێكیدا لەگەڵ كەناڵێكی سعودی ڕایگەیاند: ئەو بەرپرسانەی لە دوای ڕووخانی ڕژێمی بەعس هەماهەنگییان لەگەڵ كردووە، سیاسی نەبوون، بەڵكو بەشێكیان كەسانێكی بێئەزموون بوون، بەشێكیشیان تەنها دەیانویست پارەیان دەست بكەوێت. بەشەكەی دیكەشیان تەنها بوونەتە هۆی كاتكوشتنی. هەر ئەمەش هۆكار بووە عێراق بۆ وڵاتێكی تائیفی دابەش ببێت و نەبێت بە وڵاتێكی مەدەنیی هاوچەرخ.

دوای لەشكركێشی ئەمریكا بۆ سەر عێراق و داگیركردنی، پۆڵ بریمەر وەك حاكمی مەدەنی ئەمریكا دەستبەكار بوو، لە دیارترین كارەكانیشی، هەڵوەشاندنەوەی سوپای عێراق و لابردنی پاشماوەكانی بەعس بوو.