15 کاتژمێر پێش ئێستا
115 جار خوێنراوەتەوە
عێراق بە پارەیەکى زۆر كەشتیی بەرهەمهێنەری كارەبا لە توركیا بە كرێ دەگرێت
پەیام
بۆ چارەسەركردنی كێشەی كەمی كارەبا حكومەتی عێراق بە بڕە پارەیەکى زۆر كەشتییەكانی بەرهەمهێنەری كارەبا لە توركیا بە كرێ دەگرێت.
حكومەتی عێراق ڕایگەیاند: گەیشتووەتە ڕێككەوتنێكی نوێ لەگەڵ یەكێك لە كۆمپانیا توركییەكان بۆ بەكرێگرتنی كەشتیی تایبەتمەند بە بەرهەمهێنانی كارەبا.
ئامانج لەم هەنگاوە پشتیوانیكردنە لە تۆڕی نیشتمانیی كارەبا لە وەرزی گەرمای هاویندا كە خواستی زۆر لەسەر كارەبا دروست دەبێت، بەتایبەتی لە ناوچەكانی باشووری وڵات وەك پارێزگای بەسرە.
ئەم كەشتییانە كە لە بەندەرەكانی عێراق لەنگەر دەگرن، بڕێكی سنووردار لە وزەی كارەبا بەرهەم دەهێنن، بەگوێرەی خەمڵاندنەكان، بەشداریی ئەم كەشتییانە كەمتر لە 1%ی كۆی گشتیی خواست لەسەر كارەبا لەسەر ئاستی نیشتمانی پێك دەهێنێت كە لە كاتەكانی لوتكەدا خواستەكە 50 هەزار مێگاوات تێدەپەڕێنێت.
شارەزایان جەخت لەوە دەكەنەوە ئەم هەنگاوە چارەسەرێكی كاتی و زۆر گرانبەهایە، چونكە تێچووی بەكرێگرتنی ئەم كەشتییانە نزیكەی یەك ملیۆن دۆلارە لە ڕۆژێكدا، ئەمەش بارگرانییەكی دارایی گەورە لەسەر دەوڵەت دروست دەكات.
زیاد هاشمی، توێژەر و شارەزای ئابووری، پێی وایە كەشتییەكانی بەرهەمهێنەری كارەبا بەزۆری لە حاڵەتە كتوپڕەكان و كارەساتە سروشتییەكاندا بەكار دەهێنرێن.
لە تۆڕە کۆمەڵایەتیەکان شەیری بکە