وەزارەتی سەرچاوە ئاوییەكان: عێراق تا پێنج ساڵی دیكەش كێشەی كەمئاوی دەبێت

پەیام 

وەزارەتی سەرچاوە ئاوییەكانی عێراق بڵاوی كردەوە، لە ئێستادا بەشێوەیەكی كاتی كێشەی ئاوی خواردنەوەی بەسڕە چارەسەر كراوە، بەڵام وڵات تاكو پێنج ساڵی دیكەش گرفتی كەمئاوی دەبێت.

بەپێی ڕاگەیەنراوی وەزارەتی سەرچاوە ئاوییەكان، لە ڕێگای شەش پەمپەوە ئاوی ڕووبار لە شەتولعەرەبەوە بۆ بەسڕە ڕادەكێشرێت و لە ئێستادا سێ پەمپ خراونەتە كار كە ئاوی 90 لەسەدی دانیشتوانی بەسڕە دابین دەكات و لە ئایندەشدا پەمپەكانی دیكەش دەخرێنە كار.

وەزارەتی سەرچاوە ئاوییەكانی عێراق لەبارەی قەیرانی ئاوی وڵاتەكەوە رایگەیاندووە، جگە لە دابەزینی پێوانەیی لە یەدەگی ئاوی وڵاتەكەدا، كە بۆ یەكەمجار لە مێژووی خۆیدا ئاستێكی پێوانەیی تۆمار دەكرێت، لەگەڵ ئەوەشدا دابەزینی مەترسیدار لە بەردانەوەی ئاو لە وڵاتانی دراوسێ بۆ عێراق بەدی دەكرێت و بەنداو و پۆندەكانیش خەریكە وشك دەبن.

هەروەها راشگەیەنراوە، پڕۆژەی ستراتیژی بۆ چارەسەركردنی قەیرانی ئاو جێبەجێ كراون، بەڵام قەیرانی ئێستای ئاو كاتی نییە، بەڵكو بەردەوامە، بۆیە ئەو بابەتە پێویستی بە چارەسەری ستراتیژی درێژخایەن هەیە بۆ تێپەڕاندنی یەكجارەكی، كە گرنگترینیان شیرینكردنی ئاوی دەریا و بەكارهێنانی گونجاوی ئاوی خواردنەوەیە.
ئاماژەی بەوەش كرد، عێراق بۆ ماوەی سێ بۆ پێنج ساڵ قەیرانی كەم ئاوی بەخۆوە دەبینێت، دواتر و پاش بە ئەنجام گەیشتنی پڕۆژە ستراتیژییەكان قەیرانی كەمئاوی نامێنێت.