كۆشكی سپی: هێزی وشكانی له‌ ئۆكرانیا جێگیر ناكه‌ین

کۆشکی سپی ڕایگەیاند کە سەرۆکی ئەمریکا، دۆناڵد ترەمپ درک بە گرنگی دەستەبەرکردنی ئەمنی بۆ بەدیھێنانی ئاشتی ھەمیشەیی لە ئۆكرانیا دەکات و جەختی لەوە کردەوە کە ئەمریکا وەک بەشێک لە دەستەبەرکردنی ئەمنی ھێز لە  ئۆكرانیا جێگیر ناکات.
وتەبێژی کۆشکی سپی ئەمریکا، کارۆلین لیڤیت لە کۆنگرەیەکی ڕۆژنامەوانییدا ئاماژەی بەوەدا: "بەدڵنیاییەوە دەتوانین یارمەتیدەربین و ھەماھەنگی بکەین، ئاسایشى زیاتر بۆ ھاوپەیمانە ئەورووپییەکانمان دابین بکەین".
وتیشی: "سەرۆک دۆناڵد ترەمپ درک بە گرنگی دەستەبەرکردنی ئەمنی بۆ بەدیھێنانی ئاشتی ھەمیشەیی لە  ئۆكرانیا دەکات و بۆ ئەو مەبەستەش تیمی ئاسایشی نەتەوەیی خۆی ڕاسپاردووە، بۆ ئەوەی ھەماھەنگی لەگەڵ ھاوپەیمانە ئەورووپییەکان بکات".
جەختی لەوەش کردەوە کە ھەوڵەکان بەردەوامن، بۆ ئەنجامدانی دانوستانی ڕاستەخۆ لە چەند ڕۆژی داھاتوودا لەنێوان سەرۆکی ڕووسیا، ڤلادیمیر پوتین و سەرۆکی  ئۆكرانیا ، ڤۆلۆدیمێر زێلێنسکی.
ڕاشیگەیاند: "سەرۆک دۆنالد ترەمپ بەردەوام وتوویەتی لەم شەڕەدا خاڵی ناکۆکی لەنێوان ڕووسیا و  ئۆكرانیا ھەیە کە پێویستە بە گفتوگۆ چارەسەر بکرێت".