سەركردەكانی ئەورووپا بەشداریی كۆبوونەوەكەی ترەمپ و زیلینسكی دەكەن

پەیام 

سەركردەكانی ئەورووپا لە كۆبوونەوەكەی نێوان ترەمپ و زیلینسكی ئامادە دەبن كە بڕیارە ئەمڕۆ لە واشنتۆن بەڕێوەبچێت.

ئورسۆلا ڤۆن دێر لاین سەرۆكی كۆمیسۆنی ئەورووپا لە هەژماری خۆی لە تۆڕی كۆمەڵایەتیی ئێكس ڕایگەیاندووە: لە كۆبوونەوەكەی نێوان سەرۆكی ئەمریكا و ئۆكرانیا لە كۆشكی سپی بەشداریی دەكات.

دوانیوەڕۆی دوێنێش ڤۆن دێر لاین و زیلینسكی لە بڕۆكسلی پایتەختی بەلجیكا كۆبوونەوە و دواتریش لە ڕێی ئۆنلاینەوە بەشداریی كۆبوونەوەی "هاوپەیمانیی خۆبەخشان"یان دەربارەی دۆخی ئۆكرانیا كرد.

لەلایەكی دیكەوە كۆشكی ئیلیزێی فەرەنسا لە ڕاگەیەنراوێكدا باسی لەوە كردووە: ئیمانوێل ماكرۆن لە كۆبوونەوەكەی نێوان ترەمپ و زیلینكسی لە واشنتۆن بەشدار دەبێت، ئەمەش لەپێناو هەماهەنگیی نێوان ئەوروپا و ئەمریكا بۆ بەرقەراركردنی ئاشتییەكی بەردەوام بۆ پاراستنی ئاسایشی ئەوروپا و بەرژەوەندییەكانی ئۆكرانیا.

هەر بەپێی چەند ڕاگەیەنراوێكی فەرمی، سەرۆكی فینلەندا، سەرۆكوەزیرانی بەریتانیا، ڕاوێژكاری ئەڵمانیا و سەرۆكوەزیرانی ئیتاڵیاش لە كۆبوونەوەكەی نێوان ترەمپ و زیلینسكی بەشدار دەبن.

پێشتر دۆناڵد ترەمپ سەرۆكی ئەمریكا ڕایگەیاند: ڕۆژی دووشەممە لەگەڵ سەرۆكی ئۆكرانیا لە واشنتۆن كۆ دەبینەوە، ئەگەر كۆبوونەوەكە بە باشی چوو بەڕێوە ئەوا كاتی كۆبوونەوەی سێقۆڵی خۆی و پوتین و زیلینسكی دیاری دەكەن.