زێلێنسکی داوادەکات ئاگربەست لە ئاسمان، زەمین و دەریاوە دەستەبەر بکرێت

پەیام

سەرۆکی ئۆکراینا ڤلۆدیمیر زێلێنسکی ڕایگەیاند، جەنگی نێوان ئۆکراینا و ڕووسیا پێویستە بە ئاشتییەکەی هەمیشەیی کۆتایی پێ بێت و داوای کرد ئاگربەست لە ئاسمان، زەمین و دەریاوە دەستەبەر بکرێت.

زێلێنسکی دوای کۆبوونەوەی نێوان ترەمپ و پوتین لە ئالاسکا، هەڵسەنگاندنی بۆ پەیوەندییەکانی خۆی لەگەڵ هەریەکە لە سەرۆکی ئەمریکا دۆناڵد ترەمپ و سەرکردەکانی ئەورووپا کرد.

سەرۆکی ئۆکراینا ڕایگەیاند، ئەو سەرکردە ئەورووپیانەی کە پەیوەندی لەگەڵیان گرتووە، هەڵوێستێکی ڕوونیان هەبووە لەبارەی کۆتایی هاتنی جەنگی ئۆکراینا و لەسەر پێویستی دەستبەرکردنی ئاشتییەکی هەمیشەیی و ڕاستەقینە پێداگرییان کردووە.

زێلێنسکی وێڕای پێداگریی لەسەر پێویستیی ئاگربەست لە ئاسمان و زەمین و دەریاوە، گوتی: "پێویستە هەموو سەربازان و خەڵکی سڤیلی ئۆکراینا کە بە دیل گیراون، ئازاد بکرێن و ئەو منداڵانەی کە لە لایەن ڕووسیاوە ڕفێندراون، بگەڕێندرێنەوە بۆ ئۆکراینا".

سەرۆکی ئۆکراینا ڤلۆدیمیر زێلێنسکی ڕاشیگەیاند کە پێویستە پشتیوانییەکانی ئەمریکا و یەکێتیی ئەورووپا ئاسایشێکی درێژخایەن بۆ ئۆکراینا بەدی بهێنێت و گوتیشی: "هەموو بابەتێکی پەیوەندیدار بە ئۆکراینا پێویستە بە ئامادەبوونی ئۆکراینا بڕیاری لێ بدرێت و هیچ بابەتێک بە بێ ئامادەبوونی ئێمە، چارەسەرکردنی قبوڵکراو نییە".