ئیسرائیل لە كەرتی غـ.ەززە 835 مزگەوتی بە تەواوی خاپوور كردووە

پەیام 

لە دوو ساڵی ڕابردوودا سوپای زایۆنی 233 وتاربێژ و بانگخوازی لە غەززە شەهید كردووە 835 مزگەوتیشی وێران كردووە.

ئیسماعیل سەوابتە، بەڕێوەبەری نووسینگەی ڕأگەیاندنی حكومەت لە كەرتی غەززە ڕایگەیاند: داگیركەر سیاسەتی دڕندانە پەیڕەو دەكات بە ئامانجی هەڵوەشاندنەوەی كۆمەڵگەی فەڵەستینی لە ڕووی ڕۆحی و ئەخلاقییەوە، ئەویش لەڕێی بەئامانجگرتنی پیاوانی ئایینی و خاپووركردنی مزگەوت و كەنیسەكانەوە.

سەوابتە بە ئاژانسی ئەنادۆڵی وتووە، ژمارەیەك لە دیارترین بانگخواز و پێشنوێژ و وتاربێژان لە غەززە بەئامانج گیراون، لەنێویاندا یوسف سەلامە، وەزیر ئەوقاف و وتاربێژی پێشووی مزگەوتی ئەقسا كە لە ماڵەكەی خۆیدا شەهید كرا. هەروەها 232 بانگخواز و پێشنوێژی دیكەش شەهید كراون.

بەڕێوەبەری ڕاگەیاندنی حكومیی غەززە ڕاشیگەیاندووە: بەپێی دوایین ئامارەكان قەوارەی داگیركەر 835 مزگەوتی بە تەواوی خاپوور كردووە، هەروەها زیانی بە 180 مزگەوتی دیكە گەیاندووە. سێ كڵێسای سەرەكییش لە شاری غەززە چەند جارێك بۆردومان كراون و بەشێكی لێ وێران كراوە و بەهۆیەوە 20 هاووڵاتیی مەسیحی گیانیان لەدەست داوە.