4 کاتژمێر پێش ئێستا
396 جار خوێنراوەتەوە
كۆبوونەوە و گفتوگۆی ئاشتی پاكستان و ئەفغانستان لە قەتەر بەڕێوەدەچێت
پەیام
بە مەبەستی كۆبوونەوە و گفتوگۆ لەپێناو ئاشتییەكی بەردەوام و ڕاگرتنی پێكدادانە سنوورییەكانی نێوانیان، شاندی ئەفغانستان و پاكستان گەیشتنە دەوحەی پایتەختی قەتەر.
لەوبارەوە وەزارەتی بەرگریی پاكستان ڕایگەیاند: شاندی وڵاتەكە لەلایەن خواجە محەمەد ئاسەف وەزیری بەرگری سەرۆكایەتی دەكرێت و گفتوگۆكانیش جەخت لە گرتنەبەری ڕێوشوێنی خێرا بۆ سەپاندنی ئاشتی و سەقامگیریی لەسەر سنووری هەر دوو وڵات دەكەنەوە.
شاندی ئەفغانستانیش بە سەرۆكایەتی محەمەد یەعقوب وەزیری بەرگری گەیشتە دەوحە و لەلایەن بەرپرسانی قەتەر و ئەفغانستانەوە پێشوازیی لێ كرا.
گفتوگۆكانی ئاشتی نێوان كابوڵ و ئیسلامئاباد دوای ئاڵۆزییەكانی ئەمدواییەی نێوان هەر دوو وڵات دێت لەسەر سنوور كە دوای هێرشێكی بزووتنەوەی تاڵیبانی پاكستان دێت لە 11ی مانگ كە بووە هۆی كوژرانی 23 پاكستانی كە 20یان ئەندامی هێزە ئەمنییەكان و سیانیان مەدەنی بوون. پاكستانیش دەڵێت: هێرشەكە لە نێو خاكی ئەفغانستانەوە ئەنجام دراوە، كابوڵیش ڕەتی دەكاتەوە.
دوابەدوای ئەو هێرشە لەلایەن هێزەكانی سەرسنووری هەر دوو وڵاتەوە پێكدادان و توندوتیژی ڕووی داوە تا لە كۆتاییدا ڕۆژی چوارشەممە لەسەر ئاگربەستێكی 48 كاتژمێری ڕێك كەوتن.
لە تۆڕە کۆمەڵایەتیەکان شەیری بکە