3 کاتژمێر پێش ئێستا
141 جار خوێنراوەتەوە
دادگای تاوانە نێودەوڵەتییەكان هەڵوەشانەوەی فەرمانی دەستگیركردنی نەتەنیاهووى ڕەتکردەوە
پەیام
دادگای تاوانە نێودەوڵەتییەكان داواكارییەكی قەوارەی زایۆنی بۆ هەڵوەشاندنەوەی دوو فەرمانی دەستگیركردن بۆ نەتەنیاهوو سەرۆكوەزیرانی قەوارەی زایۆنی و گالانت وەزیری پێشووی بەرگریی قەوارەكە ڕەتكردەوە.
هاوكات دادگای تاوانە نێودەوڵەتییەكان داواكارییەكەی ڕەتكردووەتەوە بۆ ڕاگرتنی لێكۆڵینەوە لە تێوەگلانی نەتەنیاهوو و گالانت لە ئەنجامدانی جینۆساید لە كەرتی غەززە.
ئەم داواكارییەی قەوارەی زایۆنی چەند ڕۆژێك دوای واژۆكردنی ڕێككەوتنی ئاگربەست لە غەززە دێت، ئەمەش هەوڵی تەلئەبیب نیشان دەدات بۆ قۆستنەوەی وەستانی شەڕەكە بۆ ڕزگاربوون لە لێكەوتەكانی ئەو جینۆسایدەی هێزەكانی لە غەززە ئەنجامیان داوە.
لەسەرەتای 7ی تشرینی یەكەمی 2023ەوە، قەوارەی زایۆنی جەنگی كۆمەڵكوژی بۆ سەر غەززە دەست پێ كرد كە دوو ساڵی خایاند و بووە هۆی شەهیدبوونی زیاتر لە 67 هەزار فەلەستینی، زۆربەیان ژن و منداڵ بوون، ئەمە جگە لە وێرانكردنی شارەكانی كەرتی غەززە و ئاوارەكردن و برسیكردنی دانیشتوانەكەی.
لە 21ی تشرینی دووەمی ساڵی ڕابردوو، دادگای تاوانە نێودەوڵەتییەكان دوو فەرمانی دەستگیركردنی بۆ نەتەنیاهوو و گالانت دەركرد، ئەوەش لەكاتێكدا بوو كە سوپای داگیركەری زایۆنی بە فەرمانی نەتەنیاهوو ڕۆژانە دەیان هاووڵاتی لە غەززە شەهید دەكرد.
لە تۆڕە کۆمەڵایەتیەکان شەیری بکە