بۆ تاوتوێكردنی كۆتاییهێنان بە جەنگی ئۆكرانیا، ترەمپ و پووتین كۆدەبنەوە

پەیام 

لە پەیوەندییەكی تەلەفۆنیدا سەرۆكانی ئەمریكا و ڕووسیا گفتوگۆیان لەبارەی پەیوەندییە بازرگانییەكانی نێوان هەردوو وڵاتەوە كردوە و باسی كۆتاییهێنان بە جەنگی نێوان ڕووسیا و ئۆكرانیاش كراوە.

دۆناڵد ترەمپ، سەرۆكی ئەمریكا، ڕایگەیاند پەیوەندییەكی تەلەفۆنی "زۆر بەرهەمدار"ی لەگەڵ هاوتا ڕووسییەكەی، ڤلادیمێر پوتین ئەنجام داوە و تیشكی خستووەتە سەر داهاتووی پەیوەندییە بازرگانییەكانی نێوان هەردوو وڵات دوای كۆتایی هاتنی جەنگی ئۆكرانیا.

ترەمپ لە پلاتفۆرمی "تروس سۆشیاڵ"ـی خۆی نووسیویەتی، تازە پەیوەندییە تەلەفۆنییەكەم لەگەڵ سەرۆك پوتین كۆتایی هات، زۆر بەرهەمدار بوو، ئاماژەی بەوەش كردووە، بەشێكی زۆری گفتوگۆكە بۆ تاوتوێكردنی ئاسۆكانی بازرگانی و هاریكاری دوو قۆڵی دوای جەنگ تەرخان كراوە.

هاوكات ترەمپ ئاشكرای كرد، كە ڕێككەوتوون لەسەر ئەنجامدانی كۆبوونەوەیەكی ڕووبەڕوو لەگەڵ سەرۆكی ڕووسیا لە بوداپێستی پایتەختی هەنگاریا، بۆ گفتوگۆكردن لەسەر ئەگەری كۆتاییهێنان بە جەنگی نێوان ڕووسیا و ئۆكرانیا.

وتیشی، هەفتەی داهاتوو وەك ئامادەكارییەك بۆ گفتوگۆی سیاسی فراوانتر، كۆبوونەوەیەك لە نێوان ڕاوێژكارانی باڵای هەردوو وڵاتدا ئەنجام دەدرێت.

ترەمپ ڕوونیشی كردەوە، كە سبەینێ چاوەڕوانی كۆبوونەوەیەكە لەگەڵ زێلێنسكی سەرۆكی ئۆكرانیا، بۆ تاوتوێكردنی وردەكارییەكانی گفتوگۆكەی لەگەڵ پوتین.