عێراق ئیدانەی دەرچوواندنی یاسایەكی بۆ لكاندنی كەناری رۆژاوا بە ئیسرائیل كرد

پەیام 

وەزارەتی دەرەوەی عێراق ئیدانەی دەرچوواندنی یاسایەكی لە كنێستی قەوارەی داگیركەری زایۆنی كرد بۆ لكاندنی كەناری رۆژاوا بە قەوارەكەوە.

پاش پەسەندكردنی پڕۆژە یاسایەك لەلایەن كنێستی قەوارەی داگیركەری زایۆنییەوە كە ڕێگا بە لكاندنی كەناری رۆژاوای فەلەستین بە قەوارەكەوە دەدات، دەیان وڵاتی جیهان ئیدانەی ئەو هەوڵەیان كرد و بە پێشێلكردنی ڕوونی یاسا نێودەوڵەتییەكانیان ناوبرد.

لە بەیاننامەیەكدا وەزارەتی دەرەوەی عێراقیش ئیدانەی دەرچواندنی یاساكەی كرد و ڕایگەیاند، هەوڵەكانی قەوارەی داگیركەری دەرفەتی سەقامگیری و ئاشتی لە ناوچەكەدا كەمدەكاتەوە و درێژە بە دۆخی داگیركاری دەدات.

هەروەها هەریەكە لە میسر، ئوردن، ئیندۆنیسیا، پاكستان، توركیا، جیبیوتی، سعودییە، سەڵتەنەی عومان، غامبیا، فەلەستین، قەتەر، كوێت، لیبیا، مالیزیا، نەیجیریا، كۆمكاری عەرەبی و ڕێكخراوی هاریكاری ئیسلامیش ئیدانەی هەر هەوڵێك بۆ لكاندنی كەناری رۆژاوایان بە قەوارەكەوە كرد.

پاش هەڵوێستی وڵاتانی عەرەبی و ئیسلامیش، قەوارەكە یاساكەی هەڵپەسارد.