3 کاتژمێر پێش ئێستا
27 جار خوێنراوەتەوە
پەرلەمانی عێراق داوا دەكات حكومەت (باری لەناكاو) بۆ كەمئاوی ڕابگەیەنێت
پەیام
لیژنەی دارایی و لیژنەی كشتوكاڵی پەڕلەمانی عێراق داوا دەكەن باری لەناكاو بۆ قەیرانی بێ ئاوی لە عێراقدا ڕابگەیەنرێت.
بەپێی نووسراوێك، لیژنەی دارایی ئەنجوومەنی نوێنەرانی عێراق ئاماژەی بەوە داوە، مەترسیی گەورە لە عێراق پەیوەست بە كێشە و قەیرانی ئاوەوە هەیە و كاریگەریی لەسەر تەواوی بوارەكانی ژیان هەیە، ئەمەش پێویستی بە چارەسەركردنە.
لە نووسراوەكەدا هاتووە: دوای كۆبوونەوەی هەریەك لە لیژنەی دارایی و لیژنەی كشتوكاڵی ئەنجوومەنی نوینەرانی عێراق بە ئامادەبوونی بەرپرسانی وەزارەتە پەیوەندیدارەكان، بەپێویستی دەزانین سبەی سێشەممە لە میانەی كۆبوونەوەی ئەنجوومەنی وەزیرانی عێراقدا باری لەناكاو تایبەت بە قەیرانی بێ ئاوی لە سەرتاسەری وڵاتدا ڕابگەیەنرێـت.
لیژنەی دارایی پەرلەمان ئاماژەی بەوە داوە، قەیرانی ئاو كاریگەری گەورەی لەسەر جووتیاران هەیە كە زیاتر لە 40%ی دەستی كارن لە وڵاتدا. ڕایشیگەیاندووە: پێویستە حكومەتی عێراق پلانێكی فرەلایەن ئامادە بكات كە وەزارەتە پەیوەندیدارەكان تیایدا كار بكەن بۆ چارەسەری قەیرانی ئاو لە عێراق.
نووسراوەكەی لیژنەی دارایی پەرلەمان كە واژووی یوسف كیلابی، سەرۆكی لیژنەكەی لەسەرە داواشی كردووە بڕە پارەیەك بۆ قەرەبووكردنەوەی جووتیاران لە پارێزگاكانی ناوەڕاست و باشووری عێراق دیاری بكرێت بۆ ئەوەی كێشەكانی ئەم وەرزە و وەرزی داهاتووی كشتوكاڵی پێ چارەسەر بكەن.
لە تۆڕە کۆمەڵایەتیەکان شەیری بکە