لە 24 كاتژمێری ڕابردوودا 15 تەرم لەژێر دارپەردووی بیناكان لە غــ.ەززە دەرهێنراون

پەیام 

دوابەدوای دۆزینەوەی ژمارەیەكی دیكە لە تەرمی و ڕوفاتی شەهیدەكان، ئاماری قوربانییانی جەنگی سەر كەرتی غەززە ڕۆژانە بەرز دەبێتەوە.

وەزارەتی تەندروستی فەڵەستین لە كەرتی غەززە لە ڕاگەیاندراوێكدا نوێترین زانیاری سەبارەت بە قوربانییانی هێرشەكانی قەوارەی زایۆنی سەرەڕای ئاگربەست، بڵاو كردەوە.

بەپێی ڕاگەیەنراوێكی وەزارەتی تەندروستیی فەڵەستین لە كەرتی غەززە لە 24 كاتژمێری ڕابردوودا، 19 كەسی دیكە لەسەر ژمارەی قوربانییانی جەنگی سەر كەرتی غەززە بە هۆی هێرشەكانی سوپای زایۆنییەوە زیاد بوو.

وەزارەتەكە ڕایشیگەیاندووە: لە 24 كاتژمێری ڕابردوودا 19 تەرم گەیەنراوەتە نەخۆشخانەكان كە 15یان لەژێر دارپەردووی ڕووخاوی بیناكان دەرهێنراون و لەم ماوەیەشدا حەوت فەڵەستینی دیكەش بریندار بوون.

لە ڕاگەیاندراوەكەدا ئەوەش هاتووە كە لە دەستپێكی ئاگربەستەوە 93 كەس شەهید بوون و 324 فەڵەستینیش بریندار بوون و 464 كەسیش لە ژێر داروپەردووی بیناكان دەرهێنراون.

بەپێی ڕاگەیەنراوەكە ژمارەی ئەو كەسانەی لە حەوتی تشرینی یەكەم، مانگی 10ی ساڵی 2023وە تائێستا، بەهۆی بەردەوامی هێرشەكانی قەوارەی زایۆنییەوە لە كەرتی غەززەی فەڵەستین شەهید بوون بۆ 68 هەزار و 519 شەهید و 170 هەزار و 382 بریندار بەرز بووەوە.