4 کاتژمێر پێش ئێستا
113 جار خوێنراوەتەوە
پێدانی مووشەكی تۆماهۆك بە ئۆكرانیا تەنها واژووی ترەمپی ماوە
پەیام
میدیای ئەمریكی هەواڵی ڕەزامەندی پێنتاگۆنی بۆ ڕادەستكردنی مووشەكی تۆماهۆك بە ئۆكرانیا بڵاو كردووەتەوە و تەنها واژووی ترەمپی ماوە.
بەپێی ئەو هەواڵانەی دوێنێ میدیای ئەمریكی بڵاویان كردووەتەوە "وەزارەتی جەنگیی ئەمریكا (پێنتاگۆن) ڕەزامەندی نیشان داوە لەسەر پێدانی مووشەكی تۆماهۆكی باڵدار بە ئۆكرانیا و چاوەڕوان دەكرێت دۆناڵد ترەمپ سەرۆكی وڵاتەكە بڕیاری كۆتایی لەو بارەیەوە بدات".
ئەوەیش لە كاتێكدایە كە ترەمپ لە میانی كۆبوونەوەی لەگەڵ مارك ڕووتە سكرتێری گشتیی هاوپەیمانیی باكووری ئەتڵەسی (ناتۆ)دا ڕایگەیاند: تەنیا ئەمریكا دەزانێت چۆن موشەكی تۆماهۆك بەكاربهێنێت و ئەو زانیارییانە لەگەڵ كەسدا هاوبەشی پێ ناكات".
ئەوەیش لە كاتێكدایە كە لە كۆبوونەوەكەیدا لە 17ی ئۆكتۆبەر ڤلۆدیمێر زیلینسكی نەیتوانی ترەمپ ڕازی بكات مووشەكی تۆماهۆكی دوورمەودا بە سوپای وڵاتەكەی بدات.
هەر لەو چوارچێوەیدا و لە 23ی ئەم مانگەدا فلادیمێر پووتین سەرۆكی ڕووسیا ڕایگەیاندبوو كە لە ئەگەری بەئامانجگیرانی وڵاتەكەی بە مووشەكی تۆماهۆك ئەوا مۆسكۆ وەڵامی جددی دەبێت، ئەگەر وێرانكەریش نەبێت.
تۆماهۆك مووشەكێكی دروستكراوی ئەمریكی ئاستبەرز و دوورمەودایە و دەتوانێت لە دووری 1500 كیلۆمەترەوە ئامانجەكانی بپێكێت، لە ڕابردودا لە چەندین ململانێی وەك جەنگی كەنداو و لێدانەكانی سووریا بەكار هێنراون.
لە تۆڕە کۆمەڵایەتیەکان شەیری بکە