واشنتۆن لەڕێی مەسقەتەوە پەیامی دەستپێكردنەوەی دانوستانی ئاڕاستەی تاران كردووە

پەیام 

سەرچاوە دیپلۆماسییەكانی تاران ئاشكرایان كردووە، ئەمریكا لە ڕێگەی عومانەوە پەیامێكی بۆ ئێران ناردووە سەبارەت بە ئەگەری دەستپێكردنەوەی دانوستانە ئەتۆمییەكان كە لە مانگی حوزەیرانی ڕابردووەوە وەستاون.

بە وتەی سەرچاوەكان، پەیامەكەی ئەمریكا، کە گەیشتووەتە مەسقەت، گواستراوەتەوە بۆ لایەنی ئێرانی و تێیدا ئاماژە بە خواستی ئیدارەی سەرۆكی ئەمریكا بۆ دەستپێكردنەوەی گفتوگۆ ئەتۆمییەكان و گەیشتن بە ڕێككەوتنێكی نوێ لەگەڵ تاران، كراوە.

لەو چوارچێوەیەدا، مەجید تەخت ڕەوانچی، جێگری وەزیری دەرەوەی ئێران و دانوستانكاری باڵای ئەو وڵاتە، سەردانی مەسقەتی كرد و زنجیرەیەك كۆبوونەوەی لەگەڵ بەرپرسانی باڵای عومانی و نوێنەرانی نەتەوە یەكگرتووەكان ئەنجام دا.

ڕەوانچی دوای گەڕانەوەی بۆ تاران ڕایگەیاند: سەردانەكەی كورت، بەڵام بەرهەمدار بووە، دۆسیەی ئەتۆمی خاڵێكی سەرەكی بووە لە گفتوگۆكانیدا لەگەڵ لایەنی عومانیدا.

 دووپاتیشی كردەوە "تاران هەڵوێستی خۆی بە ڕوون و ڕاشكاوی دەردەبڕێت، بەڵام هەر دانوستانێك كە ئەنجامەكانی پێشوەختە دیاری كرابن، ڕەت دەكاتەوە".

سەردانەكەی ئەم بەرپرسە ئێرانییە بۆ مەسقەت هاوكاتە لەگەڵ جموجووڵی دیبلۆماسی كە سوڵتانی عومان بۆ زیندووكردنەوەی نێوەندگیری نێوان تاران و واشنتۆن سەركردایەتی دەكات.