سبەینێ وەزیری دەرەوەی توركیا بە سەردانێك دەگاتە عێراق

پەیام 

ئاژانسی هەواڵی ئەنادۆڵوی توركیا بڵاوی كردەوە: بڕیارە سبەی یەكشەممە هاكان فیدان وەزیری دەرەوەی توركیا سەردانێكی فەرمی بۆ عێراق ئەنجام بدات و لەگەڵ بەرپرسانی باڵای وڵاتەكە كۆ ببێتەوە.

ئاژانسەكە لە سەرچاوەیەك لە وەزارەتی دەرەوی توركیاوە ڕایگەیاند: پێشبینی دەكرێت فیدان لە دیدارەكانی لەگەڵ بەرپرسانی عێراق سوپاسیان بكات لەو بەرەوپێشچوونە خێرایەی لە پەیوەندییەكانی ئەنقەرە و بەغداد و چڕبوونەوەی پەیوەندییەكان لەسەر ئاستی باڵای نێوان هەر دوو وڵات، ڕوویداوە.

بەپێی زانیارییەكان، پرسی بەڕێوەچوونی هەڵبژاردنی ئەنجوومەنی نوێنەران، پڕۆژەی ڕێگەی گەشەپێدان، پاڵپشتی عێراق لە پڕۆسەی ئاشتی كە توركیا بە "توركیای بێ تیرۆر" ناوی دەبات، لە گفتوگۆكانی وەزیری دەرەوەی توركیا و بەرپرسانی عێراق باسوخواسیان لێ دەكرێت.

سەرلەنوێ بەگەڕخستنەوەی هێڵی نەوتیی نێوان عێراق و توركیا و ئامادەیی ئەنقەرەش بۆ ڕێككەوتنی نوێی و گشتگیر لەگەڵ عێراق لە بواری وزە یەكێكی دیكە لە تەوەرەكانی گفتوگۆكا دەبێت.