3 کاتژمێر پێش ئێستا
27 جار خوێنراوەتەوە
وەزیری سەرچاوەكانی ئاوی عێراق: وەرزی بارانى ئەمساڵ سەرەتایەكی مژدەبەخشە
پەیام
وەزیری سەرچاوەكانی ئاوی عێراق ڕایدەگەیەنێت: وەرزی بارانی ئەمساڵ مژدەی ساڵی تەڕ و پاراو دەدات.
عۆن زیاب وەزیری سەرچاوەكانی ئاوی عێراق ڕایگەیاند: وەرزی بارانی ئەمساڵ مژدەی ساڵی تەڕ و پاراو دەدات پاش گەورەترین شەپۆلی وشكەساڵی لە مێژووی عێراقدا.
لە لێدوانێكیدا بۆ ئاژانسی هەواڵی عێراقی، وەزیری سەرچاوەكانی ئاو ڕایشیگەیاند: سەرەڕای ئەوەی لە مانگی ڕابردوو هیچ بارانێك نەباریوە، بەڵام وەرزی ئەمساڵی باران سەرەتایەكی مژدەبەخشە بۆ ساڵێكی تەڕ و پاراو.
ئەو وتیشی: عێراق ئێستا لە قۆناغی كۆگاكردنی ئاودا نییە، ئێستا ئەوەی پەیدا ببێت ئاڕاستەی نێوەڕاست و باشووری دەكەین.
بەپێی قسەی وەزیری سەرچاوەكانی ئاو ڕێژەی باران لە باكوور و نێوەڕاست جیاوازە، لە باشوور كەمە، شەپۆلەكان زۆر بە بەهێزیی زیاتر ڕوو لە موسڵ و دهۆك و بەشێك لە هەولێرن، بە ئاستی مامناوەندییش سلێمانی و بەشێكی فراوانی هەولێر و دیالەیە.
عۆن زیاب ئاماژەی بەوەش دا عێراق ئێستا لە سەرەتای ساڵی ئاودایە، پێویست نییە لەئێستاوە دەست بە كۆگاكردنی بكەین، ئێستا ئەوەی پێویستە بۆ ناوچەكانی ناوەڕاست و باشوورە بۆ گرەنتییكردنی ئاودانی سەرەتایی بەرهەمی گەنم بەو ڕێژەیەی بڕیاری لێ دراوە كە یەك ملیۆن دۆنمە و ئاو بۆ ئەو ناوچانە ڕەوانە بكرێت.
وەزیری سەرچاوەكانی ئاوی عێراق ئەوەشی ئاشكرا كرد، كە لەئێستادا بەنداوی حەدیسە بە ڕێژەی 400 مەتر چوارگۆشە لە چركەیەك و بەنداوی موسڵ بە 150 مەتر چوارگۆشە لە چركەیەكدا كراونەتەوە.
لە تۆڕە کۆمەڵایەتیەکان شەیری بکە