بە پێکنەهێنانى حكومەت، لە نۆی یەکەوە حكومەتی سوودانی دەبێتە كاربەڕێكەر

پەیام 

حكومەتەكەی سوودانی تا هەشتی مانگی یەكی ساڵی داهاتوو لە ماوەی یاسایی خۆیدایەو ئەگەر حكومەتی نوێ تا ئەو وادەیە پێكنەهێنرێت دەبێت بە حكومەتێكی كاربەڕێكەر.

بە پشتبەستن بە ماددەی 56ی دەستووری عێراق، كە دەڵێت دەبێت هەڵبژاردنی ئەنجوومەنی نوێنەرانی عێراق دەبێت بەر لە 45 ڕۆژ لە كۆتایی خولی پێشخۆی ئەنجام بدرێت، واتە لە نۆی كانوونی دووەم واتە مانگی یەكی ساڵی 2026ەوە ئەندامانی خولی پێنجەمی ئەنجوومەنی نوێنەران پارێزبەندییان لێ وەردەگیرێتەوە و پێگەكانیان لەدەست دەدەن و دەبنەوە هاووڵاتی ئاسایی.

بەڵام ئەندامانی خولی پێنجەم لە ئێستادا تا 8/1/2026 دەتوانن بەردەوام بن لە كارەكانیان و یاسا دەر بكەن و كارەكانیان بۆ چاوێری وەزیرەكان و حكومەت درێژە پێبدەن، هەروەها حكومەتەكەی محەمەد شیاع سوودانییش تا ئەو وادەیە لە ئەركە ئاساییەكانی بەردەوام دەبێت و لە 9ی كانوونی دووەمەوە وەك حكومەتێكی كاربەڕێكەر هەژمار دەكرێت.

لەو بارەیەوە عەلی تەمیمی پسپۆڕی یاسایی دەڵێت حكومەتی كاربەڕێكەر دەسەڵاتی تەواوەتی نییە و مافی واژووكردنی ڕێككەوتن و هەمواری یاسا و لە فیقهی دەستووریدا بە حكومەتی بەرێوەبەری خزمەتگوزارییە گشتییەكان ناو دەبرێت.