05/12/2025
318 جار خوێنراوەتەوە
ترەمپ مژدەی كۆتاییهاتنی شەڕی چەند ساڵەی نێوان كۆنگۆ و ڕواندای ڕاگەیاند
پەیام
ترەمپ مژدەی كۆتاییهاتنی شەڕی دەیان ساڵەی نێوان كۆنگۆ و ڕواندای ڕاگەیاند، کە بەهۆیەوە ملیۆنان كەس گیانیان لەدەستداوە.
لە پێشهاتێكی سیاسیی و مرۆیی مێژووییدا، دۆناڵد ترەمپ، سەرۆكی ویلایەتە یەكگرتووەكانی ئەمریكا، كۆتاییهاتنی یەكێك لە خوێناویترین و درێژترین ململانێكانی جیهانی ڕاگەیاند.
لە میانەی كۆنگرەیەكی ڕۆژنامەوانیدا، ترەمپ ئاشكرای كرد، كە هەردوو وڵاتی كۆماری دیموكراتیی كۆنگۆ و ڕواندا گەیشتوونەتە ڕێككەوتنێكی یەكلاكەرەوە بۆ كۆتاییهێنان بە جەنگێك كە دەیان ساڵە بەردەوامە و بەهۆیەوە زیاتر لە 10 ملیۆن كەس گیانیان لەدەستداوە.
ناوبراو ئەم ڕووداوەی بە "ڕۆژێكی مەزن بۆ هەردوو وڵات و كیشوەری ئەفریقا" وەسف كرد.
سەرۆكی ئەمریكا جەختی كردەوە، كە واشنتن پابەندە بە ڕاگرتنی دەیان ساڵ لە توندوتیژی و كردنەوەی لاپەڕەیەكی نوێی ئاشتی و هاوكاری لە نێوان ئەو دوو وڵاتەدا.
هاوكات، ترەمپ ستایشی ڕۆڵی سەرۆك وەزیران و وەزیری دەرەوەی قەتەری كرد و بە پیاوێكی مەزن ناوی برد بۆ ڕۆڵی كاریگەری لەم ڕێككەوتنەدا.
لە كۆتایی قسەكانیدا، ترەمپ ئاماژەی بە دەستكەوتەكانی ئیدارەكەی كرد و ڕایگەیاند، كە خامۆشكردنی ئاگری ململانێی ڕۆژهەڵاتی كۆنگۆ، هەشتەمین جەنگە كە لەدوای گەڕانەوەی بۆ دەسەڵات كۆتایی پێ هێناوە.
لە تۆڕە کۆمەڵایەتیەکان شەیری بکە