تڕه‌مپ داوای ناردنه‌وه‌ی دوو كۆنگرێسمان بۆ وڵاته‌ ڕه‌سه‌نه‌كانیان ده‌كات

په‌یام
دۆناڵد ترامپ، سەرۆکی ویلایەتە یەکگرتووەکانی ئەمریکا، هێرشێکی توندی کردە سەر هەردوو پەرلەمانتاری موسڵمان لە کۆنگرێس، ئیلهان عومەر و رەشیدە تڵەیب، و رایگەیاند کە دەبێت ئەم دوو ژنە بنێردرێن بۆ "نەخۆشخانەی دەروونی" و بگەڕێندرێنەوە بۆ "وڵاتە رەسەنەکانی خۆیان". ئەم لێدوانانەی ترامپ دوای ئەوە هات کە لە کاتی پێشکەشکردنی وتاری ساڵانەی سەرۆک لە کۆنگرێس، گرژیی و دەمەقاڵێی توند لە نێوانیاندا دروست بوو.

ئەم ناکۆکییە کاتێک سەریهەڵدا کە ترامپ لە وتارەکەیدا ستایشی سیاسەتە توندەکانی ئیدارەکەی بەرامبەر بە کۆچبەران کرد؛ لە بەرامبەردا رەشیدە تڵەیب (کە بە رەگەز فەلەستینییە) و ئیلهان عومەر (کە بە رەگەز سۆماڵییە) بە دەنگی بەرز ناڕەزایەتییان دەربڕی و رووبەڕووی ترامپ بوونەوە. هەردوو پەرلەمانتارەکە هاواریان کرد "تۆ ئەمریکییەکان دەکوژیت"، هەروەها ئیلهان عومەر سەرۆکی ئەمریکای بە "درۆزن" ناوبرد.

ترامپ لە هەژماری تایبەتی خۆی لە تۆڕی کۆمەڵایەتی "تروس سۆشیاڵ" وەسفی هەردوو پەرلەمانتارەکەی بە "شێت و تێکچووی دەروونی" کردووە و نووسیویەتی کە پێویستە بە زووترین کات بگەڕێندرێنەوە بۆ ئەو شوێنەی لێوەی هاتوون، ئەمەش لە کاتێکدایە کە هەردووکیان هەڵگری رەگەزنامەی ئەمریکین. لە بەرامبەردا، حەکیم جێفریز، سەرۆکی کەمینەی دیموکراتەکان لە ئەنجومەنی نوێنەران، ئەم قسانەی ترامپی بە "شوورەیی و رەگەزپەرستی" ناوبرد و رەشیدە تڵەیبیش رایگەیاند کە ئەم رەفتارانەی ترامپ نیشانەی "داڕمان و تێکچوونی باری دەروونییەتی".

لە لایەکی ترەوە، ڕێکخراوەکانی مافی مرۆڤ نیگەرانیی خۆیان دەربڕیوە و پێیان وایە ترامپ حاڵەتە تاکەکەسییەکانی دەکاتە بیانوو بۆ چەوساندنەوەی کۆچبەران و دروستکردنی کەشێکی ترس و دڵەڕاوکێ. هەروەها ئاماژەیان بەوە کردووە کە ترامپ لە کاتێکدا باس لە بەرەنگاربوونەوەی ساختەکاری دەکات، کە پێشتر لێخۆشبوونی بۆ چەندین کەس دەرکردووە کە بە تاوانی ساختەکاری سزادراون، ئەمەش گومان دەخاتە سەر ڕاستگۆیی بڕیارەکانی.