فەرماندەکانى ئەمریكا دەترسن شەڕى سەر ئێران لە كۆنترۆڵ دەربچێت

پەیام 

بەرپرسێكی ئەمریكی ڕایگەیاندووە هێزەكانیان زیاترلە هەزار ئامانجیان لە ناوخۆی ئێران تێكشكاندووە، لەگەڵئەوەشدا فەرماندەکانى ئەمریكا ترسی خۆیان نیشانداوە لەوەى شەڕى سەر ئێران لە كۆنترۆڵ دەربچێت.

ڕۆژنامەی "واشنتۆن پۆست" لە زاری بەرپرسێكی ئەمریكییەوە بڵاویكردەوە كە هێزەكانیان زیاتر لە هەزار ئامانجیان لە ناوخۆی ئێران تێكشكاندووە، بە مەبەستی پەكخستنی تواناكانی ئەو وڵاتە لە بواری موشەكی و فڕۆكەی بێفڕۆكەواندا لە كورتترین ماوەدا.

بەڵام هەمان بەرپرس ئاماژەی بەوە كردووە، كە ئێران بە هەموو هێزی خۆی وەڵام دەداتەوە و فرەیی شوێنە بە ئامانجگیراوەكان و قەبارەی هێرشە پێچەوانەكانی تاران، بووەتە مایەی نیگەرانییەكی زۆر بۆ لایەنی ئەمریكی و سەرچاوە سەربازییەكان لە ناو پنتاگۆن و ئیدارەی دۆناڵد ترەمپ هۆشداری دەدەن لەوەی كە ڕەنگە ئەم ململانێیە لە كۆنترۆڵ دەربچێت.

هەروەها فەرماندە سەربازییەكانی ئەمریكا ترسی خۆیان نیشانداوە لە ئەگەری بەردەوامبوونی شەڕەكە بۆ چەند هەفتەیەكی دیكە، چونكە ئەوە دەبێتە هۆی دروستبوونی فشارێكی زۆر لەسەر كۆگاكانی بەرگریی ئاسمانی و كەمبوونەوەی تەقەمەنییە ستراتیژییەكان. 

واشنتۆن پۆست ئاماژەی بەوە كردووە كە ئەم دۆخە نەك هەر لە ڕووی مەیدانییەوە، بەڵكو لە ڕووی لۆجستی و ئامادەكارییە بەرگرییەكانیشەوە ئەمریكای خستووەتە بەردەم تەحەدایەكی گەورە.