16 کاتژمێر پێش ئێستا
158 جار خوێنراوەتەوە
نێردەی ئەمریكا لە سووریا: بۆ ئارامکردنەوەى ئاڵۆزییەکان ئامادەین بەشداریی کارا بکەین
پەیام
لە پەیامێكدا لە تۆڕی كۆمەڵایەتیی ئێكس، تۆماس باراك، باڵیۆزی ئەمریكا لە ئەنقەرە و نێردەی تایبەتی وڵاتەكەی لە سووریا ڕایگەیاندووە، وڵاتەكەی بە نیگەرانییەوە چاودێریی پێشهاتەكانی گەڕەكەكانی ئەشرەفیە و شێخ مەقسود لە حەلەب دەكات و دەڵێت، ئەمریكا و هاوپەیمانەكانی ئامادەن بۆ بەشداری كارا بەمەبەستی ئارامكردنەوەی ئاڵۆزییەكانی نێوان سوپای سووریا و هێزەكانی سووریای دیموكرات، (هەسەدە).
باراك بانگەوازی بە پەلەی بۆ بەرپرسانی حكومەتی سووریا و هەسەدە و گەڕەكە كوردنشینەكانی حەلەب و هێزە چەكدارەكان ناردووە كە دەستبەجێ شەڕ و پێكدانەكانیان ڕابگرن و، پابەند بن بە ئاساییكردنەوەی دۆخەكە.
نێردەكەی ئەمریكا لە سووریا ئاماژەی بەو كردووە، كە لە ماوەی 13 مانگی ڕابردوودا هەنگاوی گرنگ لەبارەی سەقامگیری و ئاشتی و بنیاتنانەوەی سووریا گیراونەتە بەر، جەختیش دەكاتەوە، كە واشنتۆن پابەندە بەدیدگاكەیەوە بۆ سووریا كە تەواوی چینەكانی كۆمەڵگەكەی لەخۆ بگرێت لەنێویاندا، سوننە و كورد و درووز و مەسیحییەكان و عەلەوییەكان و تەواوی خێڵەكان و دەستەبەری مافی تەواوی هاووڵاتیان بكرێت.
وتەكانی تۆم باراك لە كاتێكدایە كە ماوەی چەند ڕۆژێكە شەڕە پێكدانان لە نێوان هێزەكانی سووریای دیموكرات و سوپای سووریا لە گەڕەكەكە كوردنشینەكانی شێخ مەقسود و ئەشرەفیە لە حەلەب سەری هەڵداوە و تا ئێستایش بەردەوامە و كوژراو و برینداریش هەیە.
لە تۆڕە کۆمەڵایەتیەکان شەیری بکە