نێچیرڤان بارزانی پێشوازی لە مەرسوومەكەی ئەحمەد شەرع دەكات

پەیام 

سەرۆكی هەرێمی كوردستان پێشوازی لە مەرسوومەكەی سەرۆكی كاتی سووریا دەكات و داوای كاری پێكەوەییش بۆ جێبەجێكردن دەكات.

لە پەیامێكیدا، نێچیرڤان بارزانی سەرۆكی هەرێمی كوردستان پێشوازی لە مەڕسوومی دوێنێی ئەحمەد شەرع، سەرۆككۆماری سووریا كردووە و ڕایگەیاندووە كە داننان بە كورد وەك پێكهاتەیەكی ڕەسەن و پاراستنی مافەكانی، هەنگاوێكی گرنگی سیاسی و یاساییی دروستە بۆ بنیاتنانی سووریای نوێ و مسۆگەركردنی مافی هەمووان.

سەرۆكی هەرێم ڕێزگرتن لە فرەیی و یەكسانی وەك سەرچاوەی هێز، نەك هۆكاری دابەشبوونی بە بنەمای سەقامگیری و ئاشتیی ناو هێناوە كە پێكەوەژیانی نیشتمانی بەهێز دەكات.

نێچیرڤان بارزانی دەڵێت: لە كاتێكدا ئەم مەرسوومە بەرز هەڵدەسەنگێنین، دووپاتی دەكەینەوە، كە بەهای تەواوەتیی ئەم بڕیارانە لەوەدایە بكرێنە یاسای بەركار و لە دەستووری داهاتووی سووریادا جێگیر بكرێن بۆ ئەوەی پارێزراو و بەردەوام بن.

سەرۆكی هەرێمی كوردستان داوایشی لە هەموو لایەنەكان كردووە دوور لە توندوتیژی، پێكەوە بۆ دانانی میكانیزمی ڕوون بۆ جێبەجێكردنی ئەم مەرسوومە و گۆڕینی بۆ سیاسەت و كرداری بەرجەستە كار بكەن.