ئەمریكا پێشوازی لە بڕیاری عێراق بۆ گواستنەوەی زیندانیانی داعـ.ش بۆ وڵاتەكەی دەكات

پەیام  

ئەمریكا پێشوازی لە بڕیاری عێراق بۆ گواستنەوەی دەستگیركراوانی داعش لە سووریاوە بۆ وڵاتەكەی دەكات و دەسپێكردنی ڕێكارە یاساییەكان دژیان بە هەنگاوێكی گرنگ بۆ بنبڕكردنی تیرۆر دادەنێت.

لە ڕاگەیەنراوێكدا، ماركۆ ڕووبیۆ، وەزیری دەرەوەی ئەمریكا، خۆشحاڵی خۆی بەرانبەر بڕیارەكەی حكومەتی عێراق بۆ گواستنەوەی دەستگیركراوانی ڕێكخراوی داعش لە سووریاوە بۆ ناوەندەكانی دەستبەسەركردن لە نێوخۆی عێراق و دەستپێكردنی ڕێكارە یاساییەكان دژیان، دەربڕی.

ڕۆبیۆ ئاماژەی بەوە كرد "ئەم هەنگاوە بۆ پاراستنی ئاسایش و بەرەنگاربوونەوەی تیرۆر لە ناوچەكەدا بایەخێكی زۆری هەیە و ستایشی سەركردایەتی حكومەتی بەغدادی لەم پرسەدا كرد".

لەلایەكی دیكەوە، پیت هیگسێس وەزیری بەرگری ئەمریكا ڕایگەیاند: عێراق بە گرتنەبەری ئەم ڕێكارانە بەرپرسیارێتی خۆی لە ناو هاوپەیمانێتی نێودەوڵەتیدا جێبەجێ دەكات. 

ناوبراو جەختیشی كردەوە كە پێویستە وڵاتانی دیكەش هاووڵاتییە (چەكدارەكانیان لە داعش) وەربگرنەوە و لە وڵاتەكانی خۆیان دادگایییان بكەن.

ڕۆژی چوارشەممە فەرماندەیی ناوەندیی ئەمریكا (سێنتكۆم) دەستپێكردنی ئۆپڕاسیۆنێكی بۆ گواستنەوەی زیندانیانی داعش لە باكووری ڕۆژهەڵاتی سووریاوە بۆ عێراق ڕاگەیاند. عێراقیش بە هەنگاوێك بۆ پاراستنی ئاسایشی نیشتمانی ناوی برد.