هەواڵگریی ئەمریکا: ئێران هەوڵی تیرۆركردنی بەرپرسان و دیپلۆماتکارانی ئەمریکی دەدات

پەیام

ڕۆژنامەی نیویۆرک تایمز بڵاویکردەوە، هەواڵگریی ئەمریکا گەیشتووەتە ئەو ئەنجامەی ئێران بە شێوەیەکی بەرچاو هەوڵەکانی بۆ ئامانجگرتنی دیپلۆماتکار و بەرپرسانی ئەمریکی لە رۆژهەڵاتی ناوەڕاست و دەرەوەی ئەو ناوچەیە چڕکردووەتەوە.  

ئەوەشی خستووەتەڕوو، حکوومەتی ئەمریکا ئاستی ئامادەباشیی کارمەندەکانی لە سەرانسەری رۆژهەڵاتی ناوەڕاست بەرزکردووەتەوە و رێوشوێنی بۆ کەمکردنەوەی ژمارەی فەرمانبەرانی باڵیۆزخانە و کۆنسوڵخانەکانی لە ناوچەکە گرتووەتەبەر.

ڕۆژنامەكە لە زاری بەرپرسانی ئەمریکییەوە رایگەیاندووە، هەڕەشەکانی ئێران بۆ سەر ئەمریکییەکان لە رۆژهەڵاتی ناوەڕاست گەیشتووەتە بەرزترین ئاست لەوەتەی جەنگ لە شوباتی رابردووەوە دەستیپێکردووە، ئەو بەرپرسانە روونیانکردەوە، توانای ئێران بۆ هێرشکردن لە ناو خاکی ئەمریکا هێشتا سنووردارە، لەکاتێکدا دۆناڵد ترەمپ، بەردەوام زانیاری و راپۆرتی نوێ لەبارەی ئەو هەڕەشانەی سنووری رۆژهەڵاتی ناوەڕاست دەبەزێنن لەلایەن ئێرانەوە، پێدەگات.

بەرپرسان باسیان لەوە کردووە، واشنتن داتای لەبەردەستە ئاماژە بە ئەگەری بوونی کەسانی سەر بە ئێران لە ناو ئەمریکا دەکات. هاوکات جەختیان لەوە کردەوە، کە پلانی ئەگەریی ئێران بۆ ئامانجگرتنی ئەمریکییەکان، وڵاتانی ئەوروپاش دەگرێتەوە.